AR hotu leh páwl hruaitute'n CM an kâwm

Assam Rifles inspector general Maj.Gen. VK Nambiar chuan nimin khan chief minister Lalduhoma a pisaah a hmu a; Mizoram OET Coaching Hub (MOCH), Charkos Global hotute leh Mizoram Elected Women Representatives hruaitute'n an kâwm bawk.

Maj.Gen. VK Nambiar chuan, Assam Rifles-in Mizoram leh India hmarchhaka hmalakna an kalpui tlangpuite CM a hrilh a, "Assam Rifles hian Mizote ṭhian ṭha ni zel turin kawng tam takah hma kan la ve a ni," a ti. Zokhawsanga AR-te'n anmahni senso liau liaua an din sikul tlawh turin CM a sáwm a, Chhingchhipa Sainik School-in mamawh an neihte pawh a thlen a ni.

Lalduhoma chuan, Mizoram chu ram dang karcheha awm a nih thu sawiin, "Tunah pawh ruihhlo leh dan loa kuhva ro tawlh a nasa em em. Heng thil ṭha lo kal ṭhinte hi tihtawp hmiah kan tum a, nangni pawhin nasa takin in thawk tih ka hria, lawmthu ka sawi. Theihtawp lo chhuah chhunzawm turin ka ngen che u a ni," a ti.

Chief Minister chuan, Chhingchhipa Sainik School-in state sorkar aṭanga mamawh a neihte chu ziaka a hnena thlen turin Assam Rifles hotupa a hrilh a ni.

United Kingdom-a Mizo nurse-te hna hmuhsak ṭhintu Mizoram OET Coaching Hub (MOCH), Charkos Global péng pakhat neitu Lalrinawmi Fanai leh Mary Zothanchami te chuan CM hnenah an hmalaknate an hrilh.

An sawi danin, MOCH hian Charkos Global UK nen ṭang dunin kum khat leh a chanve Mizoramah hna an thawk tawh. Training an buatsaih chu UK-a nurse hna thawk duh mi 19-in an zo tawh a, an zinga 14-in UK-ah nurse hna thawk mekin, thla khatah Rs 3,00,000 vel an hlawh pha vek a ni.

Mizoram Youth Commission nena inremna siamin, nurse training-in hna a hmuh chuan sponsor nan MYC-in Rs 50,000 an pe ṭhin a; mahse, MYC sponsorship chu tihtàwp a nih avangin harsatna an tâwk a, chhunzawm leh turin CM an ngen.

Chief Minister chuan, tun hnaia British deputy high commissioner Dr Andrew Flemming nena an inkawmnaah Mizo nurse tam zawk UK-a thawn dan tur an sawi dun thu leh chak taka bawhzui an remtih dun thu a sawi a, "Chumi hnathawktu pakhat chu in nih avangin a theih anga ṭanpui che u hi a ṭhat a rinawm," a ti.

CM Lalduhoma hi India Mission Association hruaitute'n a pisaah an kâwm a; Lalduhoma chuan, MP a nih laiin Christian Dalit Liberation Movement-a patron a nih tawh thu sawiin, chumi kaltlanga hma an lo lak ve tawh dante a sawi. CM hmutute hi IMA general secretary Rev. Dr Isaac Raja, global ambassador Rev. Rajesh Tiwari leh Synod Mission Board secretary Rev. R Lalhmingsanga te an ni.

All Mizoram Elected Women Representatives hruaitute pawhin Chief Minister hi a pisaah kâwmin, lawmpuina an hlan. Mizorama a hmasa ber ni tura Lalrinpuii cabinet minister-a a dah avangin lawmthu an hrilh a, "Hmeichhiate hamṭhatna lam hawi thu ṭha tak tak i sawite hian kan thla a timuang hle a ni," an ti.