CYMA OB leh CM an inkâwm

Central YMA officer bearer-te chuan nimin khan chief minister Lalduhoma a pisaah an kâwm a, thil pawimawh hrang hrang an sawipui.

CYMA hruaitute hian Chief Minister chu an lawmpui thu an hrilh a, "Sorkar tharah hian rinna kan nghat a, a ṭul ang zela sorkar nena thawhho kan inhuam," an ti a, sorkar thawhpui an inhuamnate an hrilh.

Chief Minister leh CYMA OB-te hian environmental clearance chungchang te, Assam Rifles ram chhunga pass neitute chungchang te, ruihhlo tam ta lutuk do dan tur ṭha nia an hriat te, kuhva ro tawlhruk thu te, free movement regime chungchang te, Manipur aṭanga himna zawnga lo lut Zo hnahthlakte chungchang te, Chapchar Kût thleng tura YMA ngaihdante leh thil pawimawh dangte an sawiho a ni.