Bawlhhlawh paih chhunzawm dawn

Aizawla bawlhhlawh paih lirthei neitu pawl, Aizawl Garbage Vehicle Owners Association (AGVOA)-te'n bawlhhlawh paih man local council-te bank account-ah thun a nih tak avangin January 15, 2024 aṭanga bawlhhlawh paih loh an tum chu an sût tih an puang.

AGVOA hian bawlhhlawh paih man October 2023 aṭanga an dawn loh avangin lungawi loh lantir nan January 8, 2024 aṭang khan bawlhhlawh paih lirtheiah puan dum an zâr a; January 15, 2024 aṭangin bawlhhlawh paih loa lirthei dintir an tum bawk.

January 8, 2024-ah Mizoram sorkarin bawlhhlawh paih man tur sum AMC-ah a pe tih tarlangin AGVOA chuan, "AMC pawhin October leh November bawlhhlawh paih man aṭanga a tum tur 60% chu 12.01.2024 hian LC-te bank account-ah a thun a, December-a paih man pawh karleh lama LC account-a thun hman turin AMC-in hma an la mek bawk," an ti. Hei vang hian lungawi lohna an lantir mek leh lantir zel an tum chu an titawp ta a ni.