MLA tana training buatsaih khar

Mizoram Legislative Assembly member-te tana ni thum awh Leadership Innovations Training chu nimin khan Assembly Secretariat conference hall-ah khar a ni a, chief minister Lalduhoma'n a hmanpui.

MLA-te training hi Assembly Secretariat leh Administrative Training Institute (ATI)-te ṭangkawp buatsaih a ni a; CM Lalduhoma chuan, training-naa eng emaw harsatna avanga tel thei lote pawh study material pek vek an nih dawn thu sawi a, "Karleh lamah training hi Delhi lama chhunzawm leh tur a ni a, chutah pawh chuan tel theih vek tum ila a ṭha hle ang. Training min buatsaihsak chhan hi thil dang atan ni loin, roreltu (legislator) ṭha kan nih theih nan a ni a, kan ram tan a ni," a ti.

A zir zui peih leh peih lote an inthlau thei viau tih sawiin Lalduhoma chuan, "Tunlai khawvelah technology a sàn tawh avangin tunlai thil thar ber ber man phak kan nih a ngai a, chutiang tura kan inbuatsaih zel chu a pawimawh," a ti a; legislator tan thawhrim a pawimawh thu te, zir peih a ṭulzia leh thil thlir thiam a hlutziate a sawi.

MLA-te aiawhin K Sapdanga, Home minister pawhin training neih fo a hlawk dawna a hriat thu a sawi a; Assembly speaker Lalbiakzama training a hlawhtlin theih nana mawhphurhna hrang hrang neitute chungah lawmthu a sawi.

Inkhawm kaihruaitu chief secretary Dr Renu Sharma pawhin training an buatsaih chhan leh a pawimawhnate a tarlang a ni.