SYS Minister-in infiamna hmun a tlawh

Sport & Youth Services minister Lalnghinglova Hmar chuan nimin zing khan Mizoram State Sports Council hnuaia sport association hrang hrangte enkawl Ramhlun Sports Complex-a hmunhmate a tlawh kual a, MSSC secretary John Ṭanpuia leh pawl hruaitute'n an ṭawiawm.

SYS Minister hi sport association hrang hrang hruaitute chuan an mamawhte an lo sawipui a, infiamna hmunhma tihchangtlun dan turte an sawiho a ni.

Lalnghinglova Hmar chuan, "Sport lama kan ngaih pawimawh hmasak tur chu infiammite leh sport association a ni a, chuvangin sport association hmunhma MSSC hnuaia awmte kan tlawh a ni," a ti a; sport association harsatna leh mamawh an sawiteah a tih theih chinah theihtawp chhuahpui a tum thu a sawi.

SYS Minister chuan, "Medal la thei tura inchher kan tum dawn a, chu lam hawi chuan ke pên zel kan tum. Kan hmunhma neih angte hi a ṭha tâwk lo a nih pawhin hmang ṭangkai ila, dîm leh duat takin i enkawl ang u," a ti.

Sports Minister hian Ramhlun Sports Complex-ah hian boxing, volleyball, basketball, football, wrestling, body building, weightlifting leh tennis hmunhmate a tlawh a ni.