Chief Minister Relief Fund for Covid-19; Rs 31,38,45,636 thawh khawm a ni

Covid-19 hripui lên lai khan Chief Minister Relief Fund for Covid-19 ah mimal leh páwl hrang hrangin cheng nuai 3,138.45 an thawh a, Covid-19 kaihhnawih thil chi hrang hrangah cheng nuai 3,084.07 hman a ni a; July 25, 2023 dinhmun angin sum hman bâng Rs 54,37,881 a awm.

RTI Act tlawhchhana zawhna Chief Minister's Office SPIO-in a chhàn danin, CM Relief Fund for Covid-19 ah hian mi inphalte'n Rs 31,38,45,636 an thawh khawm a, sum thawh khawm aṭang hian Covid-19 kaihhnawih chhawmdawlna leh ṭanpuina te, Covid-19 vanga thite râlna te, damdawi bungrua leh khawl hrang hrang lei nante Rs 30,84,07,755 hman a ni.

SPIO tarlan danin, CMRF for Covid-19 a sum thawh khawm Rs 31,38,45,636 aṭangin TrueNAT khawl leh a hmanrua hrang hrang lei a nih bakah, rapid antigen test (RAT) hmanrua eng emaw zat lei a ni a; chu'ng atan chuan Rs 4,60,12,830 hman a ni.

Tualchhunga protective gear siam lei nan Rs 20,00,000, inkhàrkhip (lockdown) vanga chhungkaw hrang hrang chhawmdawl nan Rs 1,54,28,000, Covid-19 pamphlet 3,00,000 siam nan Rs 9,00,020, damlo bill leh CCCC-a awmte enkawlna senso atan Rs 1,99,44,917 leh, Mizoram páwna Covid-19 vanga tangkhangte buaipuina leh state hrang hranga Mizo welfare-te chhawmdawlna atan Rs 3,10,13,501 hman a ni bawk.

CMRF for Covid-19 sum hmanna SPIO-in a tarlan zingah MLA pathum - Lalchamliana, R Lalzirliana leh Robert Romawia Royte te hnenah Rs 25,00,000 ṭheuh pek let a ni a; sum hmanna dangte chu - task force duty-te puihna. tlawmngai pawl hrang hrang puihna, task force duty damlo kanna leh leh thite ralna, district hrang hranga home, centre, jail leh Covid-19 veite enkawlna leh chhawmdawlnate a ni.

May 2023 khan Manipur tualchhung buainaa NGO Coordination Committee senso atan CMRF for Covid-19 aṭangin Rs 2,62,718 hman a nih thu SPIO chuan a tarlang. Covid-19 lên laiin Aizawk bikah Aizawl Municipal Corporation huam chhunga chhungkaw 9,750 hnenah chhawmdawlna Rs 1,500 ṭheuh pek niin, a vaiin Rs 1,46,25,000 hman a ni a; AMC-a chhungkaw 7,330 hnenah ei leh bara puihna Rs 2,000 ṭheuh, a vaiin Rs 1,46,60,000 hman a ni bawk.

Chief Minister Relief Fund (CMRF) pangngaiah chuan sorkar kum 2018-19 aṭanga 2023-24 kum kal mekah Rs 36,42,833 a lut a, kum nga chhung vek hian CMRF aṭangin ṭanpuina Rs 36,74,586 pek chhuah a ni. CMO chuan, kum nga chhunga CMRF sum hmuh aia hman a tam zawk chhan chu, kum 2018-19 hma lama sum hman bâng leh bank interest-te a awm vang a nih thu a tarang.