Ruihhlo doah a thawktute aṭangin bul kan ṭan dawn - Chief Minister

Excise & Narcotics department (END) chuan January 13, Inrinni khan 'Ruihho do chungchanga kohhran ṭhalai hruaitute nen inkawmhona' an buatsaih a; an hun hmanpuitu chief minister Lalduhoma chuan, ruihhlo doah a thawktute aṭangin bul an ṭan dawn thu a sawi.

CM Lalduhoma chuan, ruihhlo donaa thawktute ngei ruihhlo kaihhnawiha inhnamhnawih an awm thu sawiin, "A hungna berin huana thlai a peh chuan thlai ṭhat theih ngaihna a awm lo. Thawktu aṭangin bul kan ṭan dawn a, ruihhloa inhnamhnawih chu kan transfer vek dawn, a khawih ṭhangte kan phîn darh dawn. Grass root level-a khawih chíngte'n an la sim thei lo," a ti.

Ruihhlo do chu inthlan campaign lai aṭang tawhin an vei tih sawiin Lalduhoma chuan, "Tunah chuan kan vei zawngte ti thei dinhmunah Pathian leh mipui zarah kan ding ta. CM atana lakluh ka nih hnua Raj Bhavan aṭanga ka pan hmasak ber chu kan in ni loin, ṬBCC a ni a, chu chuan hna kan thawk dawn tih a tichiang àwm e," a ti a, ruihhlo do an vei tak zet thu a sawi.

Chief Minister chuan, Excise Act tihdanglam (amend) a ngai tih sawiin, "NGO leh kohhran ṭhalaite'n ruihhlo kaihhnawihah mi an endik thiang lo a, an compound leh inahte lutin, an taksate an dap a thiang lo. Mahse, hetianga an chêt hi a ṭul cháng a awm ṭhin. A ṭul ang anga dap theihna power an neih a ngai dawn. Tih theih chin a awm chuan kan hnam leh kohhran mila her rem a ṭul," a ti.

Lalduhoma chuan, ruihhlo chu ṭhalaite harsatna a nih angin a sukiang turin ṭhalaite bawk an pawimawh tih sawiin, "Ruihhloin min chîm nasa telh telh tih phat rual a ni lo, pun lam a pan zel. A huhoa Pathian biakna keini aia ti tam an awm kher lo ang. Chuti chungin chhungkua a chhe mek a, nupa inṭhen tamna ber kan ni," a ti a, harsatna hrang hrangte chu ruihhlo vanga thleng a tam bera a rin thu a sawi.

Ruihhloin Mizoram a nghawng na hle tih sawiin CM Duhoma chuan, "Khawvela dam rei lo berte zinga mi kan ni. Hmeithai leh fahrah an tam tawh hle. Hetiang reng a nih chuan kan nulate'n pasal tur an hmu zo dawn lo, Mizo tlangvalte'n an daih lo ṭan dawn. Chutiang a nih chuan sakhua leh hnam inchîmralna a thleng ang. Ruihhlo hi kan do a ṭul tak zet zet a ni," a ti.

Chief Minister chuan zu chungchang sawiho turin kohhran ṭhalaite a sáwm a, "Zu khap bur hi a ṭha ber em? Kan ṭhatpui nge kan chhiatpui tihte sawiho rawh u. Mizote hi commmittee-a kan rêl leh mimal ngaihdan a inang lo fo," a ti a; inkawmhona chu ruih theih thilin a sal behte tan chhuahna dár vawtu a nih ngei a beisei thu a sawi.

Inkawmhona hi END commissioner Z Lalhmangaiha'n a kaihruai a, END minister Lalnghinglova Hmar-in inlawmna thu a sawi. Social Welfare minister Lalrinpuii, MLA pahnih - T Lalhlimpuia leh Lalramliana bakah END secretary Vanlalchhuanga te pawh an tel.

Kohhran hrang ṭhalai 12-in aiawh an tir a, chawhnu lamah END Minister kaihhruaina hnuaiah ruihhlo do chungchang sawiho a ni. END joint commissioner Peter Zohmingthanga tarlan danin, kum 1984 aṭanga nimin thlengin ruihhlo vangin mi 1,811 an thi tawh a, mipa 1,592 leh hmeichhia 219 an ni. Ruihhlo vanga thi, END-in an chhinchhiah loh tam tak an awm an ring bawk.