PWD Minister-in kawng siam a enfiah: 'PWD hmalakna hnuaia kawng siam tih mai mai theih a ni dawn lo' - Vanlalhlana

PWD minister Vanlalhlana chuan January 13, Inrinni khan Bawngkawn-Zemabawk national highway thawm ṭhat mek, Vaivakawn leiminna hmuna kawng siam mek leh Durtlang North - Sihphir kawng zauh hna thawh mekte a enfiah a; PWD hmalakna hnuaia kawng siam tih mai mai theih a nih dawn loh thu a sawi.

Vanlalhlana chuan, PWD hmalakna hnuaia kawng siam leh enkawlte tih mai mai a theih dawn loh avangin PWD hotute chu kawng ṭha ni tura tehfung hrang hrangte tling ngei tura uluk taka hmalaknate vil ṭhin tur leh hna thawh mekte a hmunah ngei enfiaha contractor-te pawh an hmalaknate enpui zel turin a chah.

PWD Minister chuan, contactor-te chu inthlahdah loa kawng tlo leh ṭha, ram tana chhenfâkawm leh hmasawnna ruhrel pawimawh tak siam tuma ṭan la turin a hrilh bawk.

Minister ho hian kawng siamtu contractor-in a nih dan tur leh tehfung bituk hrang hrangte an zawm ṭhat leh ṭhat loh hriat nan kawng thui lam, zau zawng leh chhah dante enfiah a ni a, kawng siamna bituminous concrete (BC) hman lum zawng (temperature) pawh enfiah a ni.

Bawngkawn-Zemabawk kawng thawm ṭhat hna hi SLT Infracon Pvt. Ltd-in EPC mode-in an thawk a, Rs 5,63,17,000 senna tur a ni. Km. 7-a thui niin, a chhah zawng milimetre 40, kawng zau zawng chawhrual metre 8.20 a ni a; road marking hrang hrang - centre line, edge marking leh zebra crossing-te a keng tel. January 6, 2024 khan hna ṭan niin, July 6, 2024 ral hmaa zawh tur a ni a, hna zawh aṭanga kum thum chhung kawng siamtuin an enkawl zui ang.

Durtlang North-Sihphir inkar kawng chu km. 10.25-a thui niin, Central Roads and Infrastructure Fund (CRIF) scheme hnuaiah zauh a ni a, cheng nuai 4,657 senna tur niin, thla 30 chhunga zawh tur a ni. July 14, 2023-ah hna ṭan a ni a, PWD Aizawl Road North Division Executive Engineer thuneihna hnuaiah SLT Infracon-in an thawk.

He kawng laih mek avang hian kawngpui dan ṭhin a ni a, kawng laih (formation cutting) an zawh veleh mipui veivâkte'n harsatna an tawh loh nan GSB (Granular Sub base) phah nghal thin turin PWD Minister chuan contractor-te a hrilh.

Vaivakawn leiminna hmunah hian mamawhna vanga kawng bal thawm ṭhat hna hmasa leh hman lailawk tur PWD-in a thawk mek a, ruahman dan chuan tun kar chhungin zawh hman beisei a ni.