Mizoram sorkara minister hlui KL Lianchia thlah liam a ni

Mizoram State Legislative Assembly palinaa minister ṭhin KL Lianchia (91), Electric Veng, Aizawl chu Inrinni zan zanlai pelh hnu, nimin zing dar 0:30 khan a thi a, nimin chhun khan Electric Veng YMA Hall-ah vui a ni.

KL Lianchia hi February 7, 1933 khan Biate-ah a piang a, January 19, 1955-ah Sangmawii nen inneiin, fa panga an nei. Zirna lamah kum 1965 khan BA distinction-ah a pass a, kum 1977-ah B.Ed. a zo.

Mizo District Council hnuaiah LDA (Clerk) August 1962-ah a thawk ṭan a, kum 1965-ah Mizo High School, Khawhaiah assistant headmaster a ni a, kum 1967-ah Chhinga Veng Middle School-ah headmaster a ni. Kum 1980-ah National High School, Phullenah headmaster a ni leh bawk.

Mizo Union party a din aṭangin a zawm a, nihna pawimawh tak tak a chelh ṭhin. Kum 1982-ah PC party a zawm a, vice president-te pawh a lo ni tawh. Mizoram inthlanpui 1984 leh 1987-ahte PC ticket-in Lungpho bialah MLA atan thlan tlin a ni a, kum 1998 inthlanpuiah Khawhai bialah MPC ticket-in thlan tlin leh niin, MPC leh MNF sorkar inṭawmah cabinet minister a ni a, Health department leh Sericulture department a enkawl ṭhin.

KL Lianchia hi a thih thlengin Zoram Peoples Movement (ZPM) Val Upa Council member a ni a, ZPM tih hi a rawt chhuah a ni.