Hmun hnihah kuhva rah man

Bilkhawthlir police-te chuan nimin zing khan Buhchang péngah Bawihluna, Champhai Vengthlang North nia inchhál khalh truck AS-11 CC-2022 aṭangin Myanmar aṭanga dan loa lak luh kuhva rah ip 90 an man. Police-te chuan kuhva rah leh truck khalhtu hi vawiinah Kolasib DC hnenah hlan an tum.

January 13, Inrinni zan dar 7:30 vel pawh khan police-te chuan Sakawrdai SDPO hmalaknain Darlawn dáiah truck pahnih aṭangin ram dang kuhva hring tam tham tak an man.

Home Minister-in a social media-a a tarlan danin, kuhva hring phurtu truck pahnihte hian January 12 chhunah Champhai an chhuahsan a, police checkgate hêlin Khawbung aṭangin Biate lamah an kal a, Sakawrdai SDPO leh a hote'n Darlawn dáiah lo chângin an lo man ta a ni.

Home minister K Sapdanga chuan, "Kuhva tawlhruk titawp tura theihtawp chhuahtu kan police-te chungah lawmthu ka sawi tak zet e," tiin a tarlang.