Ruihhlo ngaite kan do dawn lo - Excise Minister

Excise & Narcotics minister Lalnghinglova Hmar chuan END department-in January 13, Inrinnia 'Ruihho do chungchanga kohhran ṭhalai hruaitute nen inkawmhona' an buatsaihah thu sawiin, ruihhlo leh a zuartute an do dawn a, ruihhlo ngaite an do dawn lo tih a sawi.

Lalnghinglova Hmar chuan, ruihhlo donaah sorkarin theihtawp a chhuah dawn tih sawiin, "State dang angin sum kan ngah lo a, kan tih theih pawh a tam lo thei. Mahse, theihtawp erawh kan chhuah dawn. Ruihhlo ngaite kan do dawn lo a, ruihhlo leh a zuarte erawh theihtawp chhuahin kan do ang," a ti.

Ruihhlo chu sorkar ringawt tan do hneh chi a ni lo tih sawiin Excise Minister chuan, "Kohhran nen kan thawhho chuan kan hlawhtling ngeiin ka ring. Tunah hian kohhran ṭhalaite nen bul kan ṭan dawn a ni. Ruihhlo dopui turin kan sáwm lo che u a, do tlang turin kan sáwm che u a ni," a ti a; páwn lam aṭang ni lo, a chung aṭanga do tlàn an duh thu a sawi.

Lalnghinglova Hmar chuan, ruihhlo vanga harsatna tâwk mekte chu kohhran ṭhalai member-te an nih thu sawiin, "Kohhran ṭhalai ṭangkaina sorkarin a hria. Ruihhlo do in kalpui mek hi uar lehzuala kalpui turin kan duh che u. Ruihhlo vanga sawichhiat kan hlawh zel lohna atan theihtawp i chhuah ang u," a ti.