KHAWTHLIR

Thisen pe

January 13, Inrinni khan KṬP, Nursery Veng Branch chuan ZMC tan thisen unit 52 an pe a, petute mipa 31 leh hmeichhia 21 an ni. ECM KTP, Edenthar Branch, Siaha chuan Siaha District Hospital tan thisen unit 22 pein, petute mipa 20 leh hmeichhia pahnih an ni a; ECM KTP, New Siaha Branch-in District Hospital tan unit 11 pein, petute mipa leh hmeichhia pakhat an ni. 20th Assam Rifles (Delta company) mi pariatte'n Siaha District Hospital tan an pe bawk.

Roll street campaign

Hnahthial District Election Office chuan January 13, Inrinni khan Hnahthial Bazarah Special Summary Revision 2024 pualin street campaign an buatsaih a; e-roll a inziahluh/siamṭhat dan bakah, rualbanlo voter-te tana ECI-in hamṭhatna hrang hrang a ruahman leh inziah luh dante inhrilhfiah a ni.

CM kawm

Chief minister Lalduhoma leh All Mizoram Teachers' Association (muster roll) hruaitute chu January 12, 2024 khan CMO-ah an inkâwm. MR zirtirtute chuan Chief Minister chu lawmpuina hlanin, an harsatnate an thlen a ni. Lalduhoma chuan, MR zirtirtute harsatna chu a hriatthiampui thu leh sorkar tharin zirna siamṭhat a tum dan tlangpuite a hrilh a; an dinhmun bik pawh uluk taka a lo zir tur thu a sawi.

AMC-in vawk vulh a khap tan dawn

Aizawl Municipal Corporation chuan khawpui chhung a thianghlim a, mipui an hrisel zawk nan leh leimin vanga chhiatna a tlem zawk nan mihring chenna in aṭanga ft. 100 aia hnaiah vawiin aṭangin vawk vulh a khap dawn. Vawk vulh khapna hi June 28, 2023-a AMC Board of Councillors ṭhukhawmin an lo rel tawh a ni a; vawk vulh duhte chuan AMC-in kaihhruaina a siamte ṭha tak zawm tur a ni.

A thlàwna inentirna

BSF 163th battalion chuan Civic Action Prog­ramme leh Nasa­mukt Bharat Abhi­yan hnuaiah January 13, Inrinni khan India leh Bangladesh inrìna depa awm Jarralchuri khuaah a thlâwna inentirna an buatsaih a, infiamna bungrua, lehkha zirna hmanrua leh bungraw hrang hrang an sem nghal.