Ramin a ṭhat phahna turah chuan tih hreh kan nei dawn lo - Sapdanga

Home minister K Sapdanga chuan, sorkar chu khawng taka kal an tum a, ramin a ṭhat phahna tur a nih dawn chuan tih hreh an nei dawn lo tih a sawi.

ZPM, Aizawl Venglai unit-in an bial chhung aṭanga MLA atana thlan mi pathumte chawimawina hun Aizawl Venglai YMA Hall-a an buatsaihah Home Minister chuan, "Kan ram Kristian ram kan tihah hian kan ram rorelnaah Kristiante tih âwm taka kan ngaih kan tih si loh tam tak a awmin kan hre ṭhin a, tunah Pathian leh mipui zarah rorelna kan chang ta a, tih tur tam tak kan hmu nghal. Khawng taka kal kan tum a, kan kal zel dawn bawk a, kan ramin a ṭhat phahna tur a nih dawn phawt chuan tih hreh kan nei dawn lo," a ti.

K Sapdanga chuan, an campaign lai aṭang tawhin lawmthu sawina tur an ngah hle tih sawiin, "Pathian leh mipui zara he dinhmun hi thleng thei kan ni a, ram leh mipui tana theihtawp chhuah hi kan bat a ni," a ti a; inthlan hmaa ZPM unit-te'n candidate-te tihautak lo tura sum an tuak ṭhin chu thil ropui tak, Mizoram inthlana thleng khát tak a nih thu a sawi.

Aizawl Venglai awmna Aizawl North-II bialtu MLA Dr Vanlalthlana chuan, ṭawngṭaipui leh thuràwn pek an mamawh reng dawn tih sawiin, "Mipuite’n beisei neiin min thlang a, chumi a taka chantir tur leh rorelna dik leh Pathian hre chunga ram hruai hna thawk turin mipuiin min beisei a ni," a ti.

Dr Vanlalthlana chuan, "Kan beisei ram, kan lo thlir ṭhin chu a taka kan hmuh ngei theih nan mipui pawhin theihtawp kan chhuah a ngai. He sorkar thar lo piangah hian kan ṭangkai vek a, party mal hnehna a ni lo a, mipui hnehna a ni," a ti a; Mizoram siamṭha turin ṭan tlan a ngaih thu a sawi.

Aizawl Venglai pa tho Lalnghinglova Hmar, minister of state chuan, mipui ṭawngṭaisakna leh thlàwpna an mamawh tih sawiin, "Theihtawp kan chhuah dawn a, mahse, chu chu a tâwk lo a, mipui pawhin tih tur kan nei. Tih tur kan ngah hle mai a, tih dik vek loh chángte nei thei kan ni a, kan kal sual tur min vênpuitu ni turin kan insáwm a ni," a ti.

MLA tlingte puala inkhawm hi ZPM Aizawl Venglai Unit vice president Biakkhuma'n a kaihruai a, zanriah an kilho nghal a ni.