Two wheeler taxi permit 1,300+ Sorkarin tun hnaiah a pe chhuak: Kan eizawnnain a tuar dawn: Aizawl Two Wheeler Taxi Association

Vanglaini palai zawhna chhangin Transport Minister chuan sorkarin mi tam zawkin eizawnna neih a duh tih sawiin, "Sorkar hnate a vang tawh si a, chuvangin mi tam zawkin eizawnna an neih theihna atan two wheeler taxi permit hi pek chhuah leh a ni. Mi tam takin eizawnna atan ṭangkai taka an hman ngei kan beisei," a ti.

TJ Lalnuntluanga chuan veng kilkhawr deuhah chuan bus leh taxi hman mai turte a van thu sawiin, "Two wheeler taxi hi hmun tam takah chuan a la tam tawk lo zawk a ni. Tin, two wheeler taxi hman zung zung tur a tam chuan lirthei neite pawhin an ken chhuah khat phahin, traffic jam thlengin nghawng neise kan duh a ni," a ti a, two wheeler taxi a tam chuan mipui tan veivah a awlsam phah tur thu a sawi.

Transport Minister sawi danin, tun hnaia two wheeler taxi permit pek chhuah a nih leh dawn khan opposition MLA-te pawh quota pek ve vek an ni.

Aizawl Two Wheeler Taxi Association (ATTA) hruaitute chuan, tunlaia Mizoram sorkarin two wheeler taxi permit a pek chhuahte chu an hriat theih chinah 1,300 chuang a ni tawhah an ngai a; Transport Minister an hmuh ṭumin Minister chuan, permit pek chungchang chu sorkar kut a nih thu leh sorkar kuta dah mai turin a lo hrilh tih an sawi a ni.

Transport department official-te chuan, sorkar hotute aṭanga two wheeler taxi pek tur list department-in an dawng tih sawiin, "List hmasa lo kal, kan print chhuah kha 1,344 a ni a, a hnuah a mala lo kal a awm leh zauh zauh. A zat chiang taka sawi a har a, a vaia pek chhuah tur zat pawh kan sawi thei rih lo," an ti.

ATTA hruaitute sawi danin, Aizawlah two wheeler taxi tlân (service) lai 496 a awm a, ATTA-ah member 680 an awm. Two wheeler taxi khalh tur hian ATTA member nih ngei a ngaih avang te, taxi pakhat chu mi pahnih/pathumte'n an khalh ṭhin avangin member an tam phah niin an sawi.

Sorkar hmasaah chuan two wheeler taxi permit pek zat tur chiang taka an hriat thu ATTA hruaitute chuan an sawi a; tuna sorkarah erawh chuan permit pek zat tur an hriat theih loh thu te, an rin dan chuan 1,400 ai pawha tam a nih an rin thu an sawi bawk.

Two wheeler taxi nei, mahnia khalh si lo an tam thu sawiin ATTA hruaitute chuan, "Tuna service mekah hian two wheeler taxi pahnih/pathum mai ni lo, pathum/pali neite pawh an awm," an ti.

ATTA hruaitute chuan, two wheeler taxi service lai 496-te chu Inrinni leh sorkar office chawlh ní-ah phei chuan tlànna tur an hriat mang loh thu te, an inṭàm chhuah ṭan mek laia permit 1,300 chuang sorkarin a pek chhuah leh avangin an eizawnna kawng a ping hle dawna an ngaih thu an sawi.

Two wheeler taxi pakhatin ni khatah Rs. 1,300 - 1,500 inkar vel an hmu tlangpui a, taxi neitute'n Rs. 600 vel an hauh tlangpui tih sawiin, petrol man bakah a khalhtute'n hlawh an nei ve ṭhin tih an sawi a; chhungkaw eizawnna atana hmang eng emaw zat an awm tih sawiin, “Sorkarin permit a pek tâk ṭeuh avang hian two wheeler tiral an awm phah nual tawh a ni," an ti.

ATTA hruaitute chuan, "Páwl kan ding ve a, ding lo ila chuan slipper nen an service mai mai ang a, rate mumal pawh nei loin an kal ang tih a hlauhawm," an ti a; an páwl chuan inthununna leh invawnna ṭha tak an neih thu an sawi.