MLA-in inthlahrung lo turin mipui a chah

Mizoram Legislative Assembly-a opposition leader Lalchhandama Ralte chuan January 9-13, 2024 chhung khan a bial Tuivawl huam chhunga khaw hrang hrang a fang a; mipui ta a nih avangin a lakah inthlahrung lo turin a bial mipui a chah.

Lalchhandama Ralte hian January 11 khan Thingsat, Khawpuar, Vaitin leh Sakawrdai khuate a tlawh a, January 12-ah New Vervek, East Damdiai, Lungsum leh Ratu khuate tlawhin, January 13 khan Sailutar, Sunhluchhip, Chhanchhuahnakhawpui, North Serzawl leh Darlawn khuate a tlawh leh a ni.

Bial atana thlan tlin a nih avangin party dang mite tan pawh bialtu MLA a nih thu sawiin Lalchhandama chuan, "Mipui ta ka ni a, tu mah ka laka inthlahrung lo turin ka chah duh. Tuivawl bial tana nghet taka ding tur, mamawhna neite tana ka tih theih china tlanchhe loa thawk zel tur ka ni a, in finchhuahna leh ṭawngṭaipuina ka mamawh hle a ni," a ti.

Lalchhandama Ralte chuan, khaw tin deuh thawah thawktu indaih lohna vanga SEDP sum hmanga zirtirtu rawihte financial year kal mek tawp thlenga sum dah sa a nih anga thawh chhunzawmtir a, zirlaite zirna tikhaihlak lo tura sorkara ngenna a thlen ngaih pawimawh a ni chu a lawmawm a tih thu a sawi a; zirtirtu indaih lohna vanga hmalakna kal mek financial year tharah ruahmanna mumal nen chhunzawm a nih loh chuan khaw tam takah zirna a khaihlak thei tih sawiin, sorkarin ngaihtuahna an sên ngei a beisei thu a sawi bawk.

Tuivawl bialtu MLA chuan, kum 2018 inthlanah vote 3 chauha a chak laiin, 2023 inthlanah chuan vote 2019-a a chak thu sawiin, "Pathian leh mipui duhsakna liau liau a ni," a ti a, a bial mipui chungah a lawm thu a sawi a ni.