CM-in British sipaia ṭan tumte a kâwm

Chief minister Lalduhoma chuan January 13, Inrinni khan CMO Conference Hall-ah British sipaia ṭan tuma inbuatsaih mekte a kâwm a, duhsakna a hlân. CM hi MLA VL Zaithanzama'n a ṭawiawm.

CM Lalduhoma chuan, British army-a luh tum mi eng emaw zat an awm chu lawmawm a tih thu sawiin, British Army-a Mizo ṭhalaite an luh theih dan tur British Deputy High Commissioner a sawipui tawh dan a hrilh a; sorkar aṭanga puihna an beiseite chu an lo zir chiang ang a, chumi hnuah la sawiho leh turin an dah.

British sipaia ṭan tumte hi Inspired Agency-in an buaipui a, mi 43 an ni a, commonwealth ram aṭanga British sipai luh theihna dan hmangin dilna an thehlut a ni.

British sorkarin dilna lehkha an kaltir dan a inan vek loh avangin an dilna thlen chin a inchen vek lo a, an zinga pakhat chuan February 29, 2024-a assesment (medical, physical leh written test) nei turin engkim a paltlang tawh a, visa pawh a hmu tawh. Mi dang 10-in assesment neih hun tur an nghak mek a, mi dangte dilna pawh buaipui mek a ni hlawm.