Manipur-ah thawmhnaw leh mutbu thawn

Central YMA chuan January 12, 2024 zan leh January 13, Inrinni zing khan Manipur Zo hnahthlak tan CYMA office aṭangin thawmhnaw lum leh mutbu tam tham tak a thawn.

Manipur tualchhung buaina vanga harsatna tâwk mek Manipur-a Zo hnahthlakte'n thlasik khaw vâwt an tawrh mek a ziaawm theih nan CYMA chuan mutbu leh thawmhnaw lum a thawn a, truck lian pathum hmangin phurh chhoh a ni. Mutbu leh thawmhnawte chu YMA, Manipur Group-in a mamawhtute hnenah an sem dawn a ni.

Mutbu leh thawmhnaw lum lam CYMA-in a thawnte hi CYMA ngen anga Aizawl khawpuia YMA branch 30-te'n an branch huam chhunga an khawn khawm a ni a; Manipur-a thawn tur hian CYMA hruaitute bakah Tuikhuahtlang Branch, Khatla Branch leh Tuikual North Branch hruaitute'n truck-ah an hláng a, thawn chhoh nan CYMA-in Rs 2,10,000 a séng a ni.