RS MP-in Reitlang Lungdawh a hawng

YMA, Reiek Branch-in Rajya Sabha MP K Vanlalvena fund Rs 12,50,000 hmanga an siam Reitlang Lungdawh chu January 13, Inrinni khan K Vanlalvena'n a hawng.

Reitlang Lungdawh hi India leh Mizoram huapa Reiek khaw mi, mi hming ṭhate chawimawina lungphun a ni a; mi 31-te chawimawina lung phun niin, IAS, IFS, MCS, professor, politician, thuziakmi, hla phuah thiam leh zaithiamte bakah, Reiek khaw chhuak Mizorama mi langsar mi 31 an ni.

MP K Vanlalvena chuan, Reiek khua chu mithiam tak tak, hla phuah thiam leh zaithiam tak tak chhuahna khua a nih thu sawiin, "Zoram tana mi hlu tak tak heti zat an lo chhuak hi ropui ka ti a, lungphun hian Reiek khua zirlai ni mekte thinlung chawh chhuah nan leh siam thar nan hmang se ka duh," a ti.

Chawimawina lungphun zingah hian unau thuma IAS ni thei - Lalthara, C Lalsawta leh Lalnunmawia Chuaungo te, IAS officer Lalchuangliana te, IFS officer Lalthlamuana Pachuau te, MLA hlui Lalthlengliana te, hla phuah thiam C Lalkhawliana te, MCS C Laltleipuii te pawh an tel a ni.