SSB-in bungrua lâk an phal lo

Mizoram leh Assam ramri buai avanga sorkar laipuiin Assam lam ramria duty tura a dah, Saihapui-V khaw bul lama awmte chuan Mizote tan Assam aṭanga bungraw lak luh an remti lo.

Saihapui-V khawtlang hruaitute hnen aṭanga Vanglaini thu dawn danin, tun hnai deuh aṭang khan SSB-te chuan Saihapui-V leh a chhehvela Mizote chu Assam aṭanga bung­raw lâk an phalsak lo. Chutih laiin, Assam aṭanga Mizorama bung­raw la tura kalte erawh chu an dang lo thung.

Assam aṭang chuan kuhva leh thil dang la tura Mizorama rawn lût an awm reng a, chu'ng mite chuan harsatna an tâwk lo. SSB-te hian Assam DIG thupek hmuin Mizote bungraw la tur chu an dang nia sawi a ni.

Saihapui-V khawtlang hruaitute chuan, SSB chêt dan avangin harsatna an tawh phah thu sawiin, "Vairengte aṭangin bung­rua kan lak luh zel a ngai a, senso a lêtin a tam phah. He thil thleng chungchang hi sorkarah kan thlen tawh a ni," an ti.

Hetih lai hian, SSB-te hian dawra thil tam tham ni lo lei tur leh an duty-na piah lama huan leh leilet neite hna thawk tura kalte erawh chu an dang lo thung.