Siahaah Beiseina Kawngzawh huaihawt

Mara Students' Organisation (MSO) chuan sorkar laka an beiseina leh ngennate tihlan nan nimin khan Siaha khawpuiah Hope Rally (Beiseina Kawngzawh) an huaihawt a, zirlai ṭhahnem tak an tel.

Siaha district-in a kum tèla HSLC result a neih chhiat tial tial chhanah MSO chuan zirtirtu indaih lohna nasa lutuk an puh a, zirtirtu dah belh turin vawi tam tak sorkar thuneitute hnenah an thlen tawh ṭhin. Mahse, tun thlengin Siaha district-a zirtirtu indaih lohna phuhru turin sorkarin hmalakna a la nei lo tih an tarlang.

MSO chuan, MNF party kaihhruai sorkarin Siaha district-a zirtirtu indaih lohna chu an bengkhawn a, an ngennate tihhlawhtlinsak ngei tura sorkar an beiseizia lantir nan Hope Rally hi an huaihawt a ni. Rally-ah hian zirlai sang chuang an tel a, Siaha district-ah zirtirtu an indaih loh thu leh zirtirtu an mamawh belh thute hmangin an au rual a ni.

Beiseina Kawngzawh hi Siaha Bazar Traffic Point-ah ṭanin, New Siaha-a Vety kâwn thleng an kal a; bul ṭannaa thu sawitu CH Beikhochhi, MSO president chuan, Siaha district-a high school zirtirtu indaih loh nasatzia sawiin, "Zirlai 70 chuang awmna sikulah zirtirtu pakhat chauh awmna a awm nual a, sikul pakhatah phei chuan an zirtirtu neihchhun pawh craft teacher a ni," a ti.