Armed Forces Veteran Day hmang
Sainik Welfare & Resettlement department chuan nimin khan Lammualah 8th Armed Forces Veteran Day an hman bakah, sipai bángte intawhkhawmna an buatsaih a; chief minister Lalduhoma'n hmanpuiin, Mizoram sorkara hna hauhsak bik sipai bángte'n an neihah harsatna an neih chuan a hnena thlen turin a chah.
Chief Minister chuan, khawi ram pawh an dinchhuahna bulah indonain hmun pawimawh a khuar deuh zel tih sawiin, "Indona a awm apianga eng ram pawhin kan hmachhuan leh kan hmanraw neih hlu ber chu sipaite in ni a, in phû ang ngeiin sorkar laipui pawhin a ngaihsak che u. Mizoram sorkara hna hauhsak bik in neihte hi in chanpualah lo dah u la, harsatna in neih chuan ka hnenah in rawn thlen dawn nia," a ti. Sipaiah Mizo ṭhalai tam zawk lut thei se a duh thu a sawi bawk.
Sipai bángte chuan sorkar laipui aṭangin a hun takah pension an lak thu te, a thlawna damdawia inenkawlna an dawn theih te, Ex-servicemen Contributory Health Scheme huangah Zoram Medical College hman theih a nih tawh thu te, Mizoram State Cancer Institute nen inremna thuthlung an ziah dawn thute sawiin, lawmawm a tih thute an tarlang.
Armed Forces Veteran Day hi kum 1947-a India ramin zalenna a neih hlim chhàwn, indo laia Indian Army-a commander-in-chief hmasa ber Field Marshall KM Cariappa pension ni champhaah hman ṭhin a ni a; a pension ní tak chu January 14, Pathianni a nih avangin Aizawlah chuan nimin khan hman a ni.