Pu Tawnluia nen keini tel loin MNF kal tawh se kan ti - Zoramthanga

MNF party chuan an pisa, Mizo Hnam Run chu kumin 2024 atan nimin khan an hawng a, MNF president Zoramthanga'n thu sawiin, MNF senior vice president Tawnluia nen kum 80 chung lam an nih tawh avangin anni pahnih tel loin MNF chu kal tawh se an tih thu a sawi.

Zoramthanga chuan, MNF hruaitu nihna chung­chang chu Tawnluia nen an sawi dun thu sawiin, "Kum 80 chung lam ve ve kan lo ni tawh a, keini tel loin kal tawh se kan ti a ni. Kan party tan theihtawp kan chhuah zel dawn a, hotute pawh kan hrilh tawh a, hotute'n remruatna an la rawn nei mai ang. MNF hruaitute ni lai term a tàwp tawh a, hotute hnenah keini chu min ngaihtuah tel tawh suh u, kan ti a ni," a ti.

Mizo Hnam Rûn hawnna inkhawm Tawnluia kaihhruaiah hian Zoramthanga chuan, MNF lungphûm chu 'Pathian leh kan ram tan', tih a nih thu sawiin, "He thuthlungin a man a pek tawh hi a tam em em. Khaw khâwm, hmeithai, fahrah leh martar thisen tam tak a luang. Party tam tak a ding tawh a, an ral leh ṭhin a, MNF erawh chu kum 63 chhung Pathianin a hruai tawh," a ti a, inthlan vawi khat vang maia nghîng lo turin an party mite a chah.

MNF President chuan, Mizorama political party-te'n vanglai nei ṭhin mahse an tlachhe leh ṭhin tih sawiin "MNF chu kum 63 chhung nghet takin Pathian leh kan ram tan kan la ding nghet zel. Tun dinhmunah pawh party ruhrel nei ṭha ber kan la ni a, Pathian leh kan ram tan kan tih tlat vang a ni," a ti.

Uniform Civil Code chungchang leh ramri thilah nghet takin an ding ṭhin nia sawiin Zoramthanga chuan, "Ramri chungchangah Home minister Amit Shah ngeiin min rawn bia a, tawlh turin min rawn ti a, 'Kan tawlh ai chuan ka bàn a ngai ang' tiin ka hrilh a, min nawr zui ngam lo," a ti a; Myanmar ráltlân leh sakhua leh hnam thilah pawh nghet taka an din thu a sawi bawk.