CM leh CVSAH hotute an inkâwm

Chief minister Lalduhoma chuan nimin khan a pisaah Selesiha College of Veterinary Science & Animal Husbandry (CVSAH) dean Dr Lalnuntluangi Hmar leh a thawhpuite a kâwm.

CM Lalduhoma chuan, hmarchhak state-a a hmasa ber tura sawi CVSAH, Selesiha thlai thianghlim leh thianghlim loh endikna, Pesticides Residue Anaysis Laboratory leina tur sum an dil chu RKVY aṭanga pek turin pawm a nih tawh thu a sawi a, "Mizoram tan mai ni lo, hmarchhak state tana ṭangkai tak tur a nih avangin sorkarin a ngai pawimawh a ni," a ti.

CVSAH hmunhma tihlen, tui lâk mumal leh hnianghnar zawk an mamawhna thu an thlente pawh a theih anga ngaihtuah a nih tur thu Chief Minister chuan a sawi bawk.

Dr Lalnuntluangi Hmar chuan, Pesticides Residue Analysis Laboratory chu kum hnih kal ta aṭanga an buaipui a nih thu sawiin, "Mipuite'n ei tur, a bikin phai aṭanga lo lut chawhmehte túr leh damdawi (chemical) him lo dang an pai leh pai loh endik theihna tur a nih avangin a ṭangkai dawn hle a, kan nghakhlel hle a ni," a ti.

Laboratory building tur leh a enkawl thei mithiam an neih sa bakah, laboratory scientist post pawh a awm thu sawiin Dr Lalnuntluangi chuan, "A khawl ber kan neih miau loh avangin a post hi kan hnawhkhat lo mai zawk a ni," a ti a; sorkarin khawl a ngaihtuah theih chuan ṭangkai taka hman a nih tur thu a sawi.

CVSAH hi Central Agriculture University, Imphal hnuaia college pakhat a ni a; under graduate (bachelor) seat 85, master degree course, department 16 leh doctorate zirna department 10 a awm. Sorkar laipuiin bachelor-ah seat 50%, post graduate-ah seat pakhat ṭheuh leh Ph.D-ah department pahnihte a hauha, a bak zawng chu Mizoram aṭanga hnawhkhah ṭhin a ni.