Mizoram Forest Act chungchang sawiho

Chief minister Lalduhoma kaihhruaiin nimin khan a pisaah sorkar hotute'n Mizoram Forest Act leh a kaihhnawih thil pawimawhte an sawiho. CM chuan, sorkar dan siam leh dan kalpuina kawng hrang hrangah mipui tana hriatthiam awlsam buatsaih a ṭul thu a sawi.

Lalduhoma chuan, sorkar policy pawimawh tak pakhat chu sorkar leh mipui indawrna te, dan siam leh dan kalpuina hrang hranga mipui tana kawng samkhai leh hriatthiam nuam buatsaih a nih thu a sawi a ni.

Chief Minister chuan, Forest Act leh dan hman mekte chu awlsam taka mipui hriatthiam leh zir theih tura siam a ṭhat thu sawiin, "Dan bu leh a siamṭhatna lehkha eng emaw zat keng khawma bih kual tawn fo ai chuan, dan thar pakhat, a hluia mi rin zui theihte awmna leh siam belh ngaite siam belh fel vek awmna ni nghal siam mai ila, a hmangtute tan zir a awlsam hle dawn a ni," a ti.

Meeting-ah hian Protection of Riverine Act, 2023 leh Mizoram Forest Act kengkawh tur leh The Mizoram Forest Act pawh amendment document tam tak awm lote zawnga siamṭhat dan ruahmanna nei turin Environment, Forest & Climate Change department an ruat; EFCC department kaltlanga hmalakna dangte an sawiho bawk.

Ṭhutkhawmah hian EFCC minister Lalthansanga leh PWD minister Vanlalhlana bakah, mi pawimawh dangte an tel a ni.