COVID-19: Mizoram dinhmun Hripui vei 27 hmuh belh a ni

Ni hnih (December 11-12) chhungin Mizoramah Covid-19 vei mi 27 hmuh chhuah a ni a; ni hnih chhung vêk, Inrinni leh nimin khan hripui laka fihlim tawh mi 24 chhuahtir an ni thung.

December 11, Zir­tawpniah Covid-19 vei mi 16 hmuh chhuah niin, mipa pakua leh hmeichhia pasarih an ni a; ZMC laboratory-a hmuh mi paruk, TrueNAT-PCR hmanga hmuh pakhat leh Rapid Antigen Test (RAT) hmanga hmuh mi pakua an ni.

December 12, Inrin­niah hripui vei mi 11 hmuh chhuah niin, mipa pariat leh hmeichhia pathum an ni a; ZMC laboratory-a hmuh mi pasarih leh RAT hmanga hmuh mi pali an ni. TrueNAT-PCR hmanga swab sample endik zingah hripui vei an awm lo.

Covid-19 positive-te enkawlna hmun aṭangin Inrinni khan hri­pui laka fihlim tawh mi 16 chhuahtir an ni a; Aizawl district-ah pakua, Lunglei district-ah pakhat, Lawngtlai leh Saitual district-ah pathum ve ve an chhuak. Nimin khan mi pariat chhuahtir an ni bawk a; Champhai leh Kolasib district-ah mi pathum ve ve leh, Serchhip district-ah pahnih an chhuak a ni.

Mizoramah Covid-19 positive mi 4,035 hmuh chhuah a ni tawh a, mipa 2,970 leh hmeichhia 1,065 an ni. Nimin tlai dar 5 thleng khan mi 3,844 (95.27%) chhuahtir an ni tawh a, mi pasarih (0.17%) thi tawhin, enkawl mek mi 184 (4.56%) an awm.

Mizorama Covid-19 positive hmuh chhuah tawh mi 4,035 zinga mi 1,907 chu Mizoram chhunga kái an ni a, mi 2,128 chu state páwn aṭanga rawn lût an ni.

December 11, Zirtawpni khan Mizoramah swab sample 956 endik a ni a; ZMC-ah mi 234, TrueNAT-PCR hmangin district pakuaah mi 219 leh RAT hmangin district 11-ah mi 503 endik a ni. Mi 956 zingah Covid-19 positive mi 16 (1.67%) an awm.

Inrinni khan swab sample 1,034 endik a ni a; ZMC-ah sample 389, TrueNAT-PCR hmangin district pangaah 104 leh RAT hmangin district pasarihah 541 endik a ni. Mi 1,034 zingah Covid-19 vei mi 11 an awm a, endik zat aṭangin 1.06% a ni.

Mizoram aṭangin swab sample 1,64,236 endik tawh aṭangin Covid-19 vei mi 4,035 hmuh chhuah a ni tawh a, chu chu endik tawh aṭangin 2.46% a tling.

Ni hnih chhunga Covid-19 positive hmuh chhuah mi 27 zinga mi 12 chu Mizoram chhunga hri kái an ni a; natna (symptom) lang chhuak mi pathum an awm. Tualchhunga kái mi 12 zingah hri kài ṭanna hriat loh mi pakhat a awm bawk.

DECEMBER 11-A HMUH CHHUAH

Sorkar thuchhuaka a lan danin, December 11-a hmuh chhuah mi 16 zingah Covid-19 symptom nei pahnih an awm a; Mizoram chhunga kái mi pariat awmin, an zingah hri kai ṭanna hriat loh an awm lo.

ZMC laboratory-a hmuh chhuah mi parukte chu tualchhunga kái pahnih leh state páwn aṭanga rawn lut mi pali an ni a; symptom nei lo vek an ni.

RAT hmanga hmuh chhuah mi pakua chu mipa paruk leh hmeichhia pathum niin, kum 7-61 inkar an ni a; symptom nei pahnih an awm. Mi pakua zinga paruk chu tualchhunga kái an ni a, mi pathum chu state páwn aṭanga rawn lut an ni thung.

ZMC-a hmuh chhuah

Durtlang North - 2: Mipa kum 19, hmeichhia kum 43. Nufa an ni a, December 10-a Covid-19 vei thi ta MK Roy (83) fanu leh tupa an ni. Symptom an nei lo.

Bethlehem Vengthlang - 1: Hmeichhia kum 42, Assam aṭanga haw, quarantine facility-a awm mek, symptom nei lo.

Chawnpui - 1: Hmeichhia kum 23, Manipur aṭanga haw; symptom nei lo.

Chanmari - 2: Mipa kum 17 & 36, Delhi aṭanga haw, quarantine facility-a awm lai, symptom nei lo.

TrueNAT-PCR hmanga hmuh:

Vairengte - 1: Hmeichhia kum 26, Shillong aṭanga haw, quarantine facility-a awm mek, symptom nei lo.

RAT hmanga hmuh:

Paithar - 4: Mipa kum 12, 24, 35 & 61. Hri kai ṭanna hriat, symptom nei lo.

Lawngtlai-III - 1: Mipa kum 38, hri kai ṭanna hriat, symptom nei.

Lawngtlai Electric Veng - 1: Hmeichhia kum 20, kaina hriat, symptom nei lo.

Vairengte - 3: Mipa kum 16, hmeichhia kum 7 & 36. Shillong aṭanga Vairengtea mitthi rál tura kal, Vairengte screening point-a hmuh chhuah. Pakhatin symptom a nei.

DECEMBER 12-A HMUH CHHUAH

December 12, Inrinnia hmuh chhuah mi 11 zingah Covid-19 symptom nei pahnih an awm a; Mizoram chhunga kái mi pali awmin, an zingah hri kai ṭanna hriat loh pakhat a awm.

ZMC laboratory-ah mi pasarih hmuh chhuah an ni a, mipa panga leh hmeichhia pahnih, kum 16-36 inkar an ni. Tun hnaia Mizoram páwn aṭanga rawn lut vek niin, Aizawl district leh Serchhip district-a sample lakte an ni a; symptom nei an awm lo.

RAT hmanga hmuh chhuahte chu mipa pathum leh hmeichhia pakhat, kum 33-47 inkar an ni a; tualchhunga hri kái vek niin, symptom nei pakhat a awm.

ZMC-a hmuh chhuah:

Chaltlang Lily Veng - 1: Mipa kum 36, Assam Regiment sipai Meghalaya aṭanga haw, symptom nei lo.

Ṭhuampui - 1: Mipa kum 28, sipai Rajasthan aṭanga rawn lut, quarantine facility-a awm mek, symptom nei lo.

Seling - 1: Hmeichhia kum 11, Manipur aṭanga haw, quarantine facility-a awm lai, symptom nei lo.

Darlawng - 2: Mipa kum 22, hmeichhia kum 24. Delhi aṭanga haw, quarantine facility-a awm mek, symptom nei lo.

BSF, Serchhip - 2: Mipa kum 31 & 36, Bihar aṭanga rawn lut 60 Bn BSF sipai, Dawngzawl camp-a khung hran lai, symptom nei lo ve ve.

RAT hmanga hmuh:

Lunglei Serkawn - 1: Mipa kum 47, hri kai ṭanna hriat loh, symptom nei lo.

Thenzawl - 1: Hmeichhia kum 33, tualchhunga kái, kài ṭanna hriat, symptom nei.

Lawngtlai Council Veng - 2: Mipa kum 36 & 40. Tualchhunga kái, kàina hriat, symptom nei lo.