Tut lui sangha man chungchangah Court-ah complaint thehluh a ni

14th December, 2020

Mamita divisional forest officer (DFO) PC Lalchhandama chuan, November 21, 2020-a Phaizau khawtlangin Tut lui dung an humhalh huam chhunga bomb hmanga sangha tam tham tak man chungchangah Mizoram (Forest) Act, 1955 hnuaiah District Court, Mamitah complaint thehluh a nih thu a tarlang.

Mamit DFO-in Conservator of Forest, Northern Circle, Kolasib hnenah December 11, 2020-a report a peka a ziah danin, Tut luia bomb hmanga sangha man chungchangah hian Assistant Public Prosecutor (sorkar ukil)-in December 11 khan Mamit Chief Judicial Magistrate hnenah complaint a thehlut. Complaint thehluha dan tlawhchhan chu Mizoram (Forest) Act, 1955 Section 23(1) leh 24(6)-te a ni.

Mamit DFO chuan, Phaizau VC & All NGOs Joint Committee-in November 29, 2020-ah press statement an siamah, MLA H Lalzirliana, Mamit MNF Block president H Lalthlengliana leh mi dangte'n November 21, 2020-ah Tut luiah bomb hmangin sangha an man thu tarlan a ni tih a ziak.

Bomb hmanga sangha manna hmun chu Reserved Forest huam chhung a nih thu ziakin, Forest chungchanga dan bawhchhiatna a awm nia a lan avangin chhui zui a nih thu a tarlang a; chhui zuina aṭangin mi 12-in November 21, 2020-ah Riverine Reserved Forest Area huam chhung, Tut luia Saitlan li / Ngawidawh lí-ah sangha an man thu a ziak bawk.

Phaizau khawtlang humhalh chhung Tut luia bomb hmanga sangha man chungchangah hian police station-ah FIR thehluh a awm tawh bawk nia thu dawn a ni.

Bomb hmanga sangha mantu tarlante

(Mamit DFO tarlan angin)

1. H Lalzirliana, MLA s/o H Thanzauva, Mamit Hmunsam

2. H Lalthlengliana s/o H Lalruata, Mamit High School Veng

3. Lalvulluaia s/o Vanlalliana, Mamit Dinthar Veng

4. Lalchhandama s/o Thanhranga, Mamit Venhlun

5. Zodingluaia s/o Vanlalringa, Phaizau

6. Hreuthangpuia s/o Zakamlova, Phaizau

7. Chuauthantluanga s/o Thanzanga, Phaizau

8. Lalrikhuma s/o Matua, Phaizau

9. MS Dawngliani d/o C Vanramtluanga, Mamit Bazar Veng

10. Sachina s/o Subha, Phaizau

11. Lalchawimawia s/o Zachhunga, Phaizau

12. Chanchinmawii d/o Chhuanvawra, Phaizau