Sorkarin a tih tur a tih hunah AR insawn ngaihtuah a ni ang - Chief Minister

Chief minister Lalduhoma chuan nimin tlai khan Zokhawsanga Assam Rifles hmun a tlawh a; state sorkarin a tih tur a tih hunah Aizawl khawpui laili aṭanga Zokhawsanga Assam Rifles insawn chungchang ngaihtuah a nih tur thu a sawi.

Zokhawsanga Assam Rifles insawn chungchanga a kaihhruai sorkar dinna Vanglaini palaiin a zawhna chhángin CM Lalduhoma chuan, "State sorkarin Zokhawsangah hian tih tur a nei a, chu'ngte chu tih zawh a nih hunah AR-te insawn chungchang hi ngaihtuah a ni ang," a ti.

Chief Minister sawi danin, Zokhawsang hmunah hian Mizoram sorkarin a tih tur ang tih loh a la nei a, tui leh power supply pawh an mamawh ang pek a la ni lo.

CM Lalduhoma hian Assam Rifles, Axis Bank leh NIEDO ṭanghoin Zokhawsanga technical leh medical entrance examination hmachhawn turte tana residential coaching class an buatsaih a tlawh nghal a; a hmuna awmte chuan an mamawhte an lo thlen.

Zirlai leh zirtirtute'n Chief Minister hi lo dawngsawngin, an hmunhmate an fanpui a, harsatna an neih zinga state sorkarin a chinfelsak theih nia an hriatte an lo hrilh. Lalduhoma chuan, a theih ang anga puih a inhuam thu a hrilh.

Coaching class atan hian AXIS Bank chuan sum an tum a, NIEDO-in zirtirtu an tum a, Assam Rifles-in hmunhma leh ṭul dangte an tum thung. Coaching class hi a thlâwna kalpui niin, lut duh tan exam buatsaih a ni a, Mizoram hmun hrang hrang aṭangin mi 28 thlan a ni.

Coaching hi kum khat chhung atan buatsaih a ni a, National Eligibility cum Entrance Test (NEET) leh Joint Entrance Examination (JEE) hmachhawn tura thil pawimawh hrang hrang zirtir an ni.