CM hlui Zorama dan bawhchhiaa puhna Lokayukta-in a ngaihtuah
Lengpui Airport tihchang-tlunnaah dan bawhchhiatna a awm nia ngaia chief minister hlui Zoramthanga hêk a nih chungchang chu Mizoram Lokayukta chuan January 16, Thawhlehni khan a ngaihtuah.
Lokayukta hotute hnen aṭanga Vanglaini thu dawn danin, CM hlui Zoramthanga hêk a nih chungchangah hian nikum kum tàwp lam khan hearing neih a ni a, complaint thehluttu Mizoram First Movement (MFM) chuan thil chhuitu Anti Corruption Bureau (ACB) report zir chianna atan hun pe turin an dil avangin Lokayukta chuan hearing neih leh hun tur a ruat a ni.
Lokayukta chuan January 16, 2024 khan hearing ko lehin, MFM leh sorkar official-te chu thu a zawtfiah a; hearing-a an sawi leh document awmte aṭangin Lokayukta chuan thubuai kalpui zel dan turah thutlukna a la siam dawn.
Chief Minister hêkna chhuitu ACB chuan Zoramthanga thiam lohna an hmu lo a; mahse, Lokayukta chuan ACB report chu an zir chian hnuah dan lam thiamte ngaihdan (legal opinion) a dil a, legal opinion aṭang pawhin hêkna chu tih zui vak ngaihna a awm loa ngaih a ni.
Lokayukta chuan ngun taka a ngaihtuah hnuah thubuai titawp mai loa hearing neih ṭha a tih avangin hearing a buatsaih a, PWD hotute leh MFM hruaitute a ko a ni.
Tarlan tawh angin, MFM chuan Lengpui Airport tihchangtlunnaah dan bawhchhiatna a awma ngaiin, a mawhphurtua an ngaih CM hlui Zoramthanga chhui turin April 11, 2022 khan Lokayukta-ah ngenna an thlen a; Lokayukta chuan chhui turin July 2022 khan ACB a hriattir a ni.
ACB hnena chhui chiang tura hriattir hmain Lokayukta chuan GAD leh PWD-ah thil ṭhenkhat an zawt hmasa a, document pawimawhte an dil bawk.
GAD leh PWD aṭanga document an dawnte chu Lok-ayukta chuan an enfiah a, MFM-in CM Zoramthanga an puhna chu chhui zui tlakah ngaiin, chhui turin ACB an hriattir a ni.