2023-2025 YMA kumpuan hawn a ni

Kum 2023-2025 chhunga YMA kumpuan, 'Ram leh hnam humhalh' tih chu January 16, Thawhlehni zan khan Central YMA president Lalhmachhuana'n Vanapa Hall-ah a hawng a, CYMA hruaitute bakah Aizawla YMA branch 109 aṭangin mi 500 vel an tel.

YMA kumpuan hawn inkhawm hi CYMA vice president Prof. Lalnuntluanga, Kumpuan Sub-Committee chairman ni bawkin a kaihruai a; general secretary Prof. Malsawmliana'n YMA kumpuan neih tawh dante leh CYMA hmalaknate a tarlang.

CYMA persident Lalhmachhuana chuan, ram leh hnam humhalh turin YMA Kumpuan kaihhruainain a sawi angin zirna lam leh sumdawnna lamahte ngaihtuahna sên a ṭul thu leh Mizo hnam ziaráng humhalh a ṭul thu a sawi.

Lalhmachhuana chuan, Mizoram chhung leh páwna awm Mizote an ṭanrual a, an inpumkhat theih nan ṭan lak a ṭul thu sawiin, "Chi bil inlâk hran tumna ang chi hi tih hauh loh tur a ni," a ti a; khawtlanga sual do turin ṭan lak nasat a ngaih thu te, khawtlangah chîmtu a tam tawh avangin khua leh veng tina YMA hruaitute'n pêm lut leh chhuak uluk taka chhinchhiah a ṭul thute a sawi bawk.

'Ram leh hnam humhalh' tih hi YMA kumpuan atan kum 14 hman a ni tawh a, kum hnih dang hman leh a nih dawn avangin kum 16 chhung hman a ni dawn ta a ni.

CYMA chuan kum­puan bawhzui dan tur kaihhruaina a siam a, chumi zui chuan YMA branch, group leh sub-hqrs ten an huam chhungah hma an la dawn a ni.