Zangnadawmna la tawh, in la ṭhiat lote kar hnih vel hnuah in ṭhiahsak leh tum

Serchhip district Competent Authority for Land Acquisition (CALA) David Lalthantluanga, bawrhsap hoin nimin khan sorkar hotu te, NHIDCL hotute leh khawtlang hruaitute an ṭhukhawm. DC chuan, NH-54 kawngpui laiha zangnadawmna la tawh, in la ṭhiat duh lote chu kar hnih/khat hnuah nawr chhiatsak an nih dawn thu a sawi.

David Lalthantluanga chuan, NH-54 laih mek chu March 2024-ah zawh tum a nih thu sawiin, "Hun rei tak mipuite'n vaivut khûte tuarin, nunphung pawh a khaihlak phah a ni. Zangnadawmna sum a zavaia la tawh si, in ṭhiat duh lo tlemtê an la awm a, heng mite lakah hian District Administration chuan khawng takin hma a la dawn. Kar hnih khat hnuah an la ṭhiat lo a nih chuan nawr chhiat a ni ang," a ti a, IPC Section 188 hmangin thubuai siamsak zel a nih dawn thu a sawi.

In ṭhiat lo zingah court-a kal, court-in stay order a pek a awm a nih chuan chu'ng mite in chu tihchhiat a ni dawn lo tih sawiin DC chuan, "Stay order an neih loh erawh chuan thu tling a nih loh avangin ṭhiah tur a ni. Zangnadawmna la lo te, assessment tih laia hmaih palh te, in chhâwng chhût kim lohte an awm chuan thuneitute nen a hmunah ngei tlawhin enfiah a ni dawn a, zangnadawmna an lak ngei theih nan hmalak a ni ang," a ti.

NH-54 kawngpui laih mekah hian Serchhip district-a zangnadawmna dawng tawh zingah a tam zawk chuan in an ṭhiat tawh a, ṭhiat lo mi tlemtê an la awm.

Ṭhutkhawmah hian Serchhip district thuneitu te, NHIDCL hotu te, Khumtung, Baktawng, Chhiahtlang, Chhingchhip, Serchhip, Keiṭum leh Bungtlang VC aiawhte an tel a ni.