Myanmar sipai 277 an rawn tlânchhia

Myanmar sipai 277 chu Arakan Army (AA) nen an inbeihnaah AA-te'n an awmna hmun (camp) an chhuh avangin an tlânchhia a, nimin khan ramri hnaih khua, Bandukbanga, Lawngtlai district-ah an lut. Heti hian thla hnih chuang hret chhungin Mizoramah Myanmar sipai 636 an rawn tlânchhe tawh.

Thu dawn danin, Myanmar sipai leh mipui sipaite hi Myanmar ram chhung Karma lui leh a chhehvelah an inkâp a ni. Assam Rifles aṭanga thu dawn danin, Myanmar sipaite hi nimin tlai dar 4 vel khan Bandukbanga-ah an lut a, an ralthuam eng emaw zat an rawn luhpui a, Assam Rifles-in an lo buaipui a ni.

Heti hian November 2023 aṭang khan Myanmar sipai 637 chu Mizoramah an rawn tlanchhe lut tawh a, nimina mi hi ṭum ruk Mizorama an rawn tlânchhiatna a ni.

MYANMAR SIPAI MIZORAMA TLANCHHIAT DAN

1. Rihkhawdar leh Ṭiau-Khawmawia Myanmar sipai camp-a awm sipai 45-te November 12-13, 2023 chhungin Zokhawtharah an lut a, November 13-ah AR-te'n Hnahlan aṭangin Indian Air Force helicopter hmangin an thawn haw.

2. Tuibual khuaa Myanmar sipai camp-a awm 29-te November 16, 2023-ah Saikhumpui, Vaphai an lut a, November 19-ah Vaphai aṭangin AR-in helicopter hmangin an thawn haw.

3. November 28, 2023-ah Lailenpi khuaa Myanmar sipai camp-a awm sipai 30-te Siaha district-a Laki khuaah an lut a; November 29-ah AR-in Tuipáng aṭangin helicopter-in an thawn haw.

4. Parva, Lawngtlai district epa Myeik Wa Camp chu mipui sipaiin an chhuh avangin December 29 khan Myanmar sipai 151 chu Tuisentlangah an tlanchhe lut. January 2, 2024-ah Myanmar sipai thlawhnain Lengpui Airport aṭangin a rawn phur haw.

5. January 6, 2024-ah Parva, Lawngtlai district-ah Myanmar sipai 103 an rawn tlânchhia a, January 9-ah Myanmar sipai thlawhnain Lengpui Airport aṭangin a rawn phur haw.

6. January 17, 2024-ah Bandukbanga, Lawngtlai district-ah Myanmar sipai 278 an tlânchhhe lut a, Mizoramah an la awm.