Covid-19 hri léng karah hmasawnna A kal mek zel - Dr R Lalthangliana

Higher & Technical Education (HTE) minister Dr R Lalthangliana chuan December 12, Inrinni khan Mamit College-a Ratriya Uchchatar Abhyan (RUSA) hnuaia Library cum Seminar Hall leh academic building sak tharte a hawng. Minister chuan, Covid-19 léng karah hmasawnna a kal mek zel thu a sawi.

Library cum Seminar Hall sakna atan hian cheng nuai 160 hman a ni a; academic building sak nan cheng nuai 153 sên a ni.

Dr R Lalthangliana chuan, SEDP hmanga mimal leh chhungkaw chawikanna tur chu Covid-19 avangin duh angin kalpui theih a ni lo tih sawiin, "Hmasawnna hna hrang hrang erawh a kal mek zel. Mizoramin hmasawnna hmél a hmuh theih nana ngaihtuahna séng sorkar in neih avangin Mamit district-ah hmasawnna hmuh tur a awm chho zel a ni," a ti.

In hawn a nih theihna tura ngaihtuahna, thâ leh zung séngtu zawng zawng chungah lawmthu sawiin Minister chuan, "Mamit College hi khawpui danga college-te ai pawhin infrastructure a nei ṭha. Zirna ṭha din turin building ṭha neih kan mamawh hmasa angin, building ṭha leh changkang tak in neih hi hmang ṭangkai ang che u," a ti a; thawktute leh zirlaite chu ṭhahnemngai taka an college timawitu nih tum turin a chah.

HTE Minister chuan, Mamit district chu Aspirational District a nih avangin hriselna, zirna leh kawng hrang hranga en bik leh chawikan ngai a ni a, sorkar laipui aṭang pawhin ṭanpuina ṭhahnem tak an dawn ṭhin thu a sawi a, "Aspirational District nih hun chhung hi hman ṭangkai tum tur. Additional fund dang hmu chhuak thei khawpa ngaihtuahna hman tum a pawimawh," a ti.

Bialtu MLA H Lalzirliana pawhin thu sawiin, Mamit district-in hmél thar a hmu mek tih a sawi a, "Chung zingah chuan Mamit College pawh tel vein, kum 30 kal taa college dintute hmathlir leh beiseina a takin kan hmu ta a ni," a ti a; sum tam tak sénga hmun dang pan ngai tawh loin, mahni in lum aṭangin lehkha zir theih a nih tawh tur thu a sawi.