KHAWTHLIR

NER Trek khâr

20 NCC Mizoram Battalion bultuma January 10, 2024 aṭanga State Training Centre, Tanhrila North Eastern Region (NER) Trek 2024 buatsaih chu nimin khan khâr a ni a, Silchar Group NCC commander Brig. Kapil Soon-in a telpui. NER Trek-ah hian hmarchhak state-te bakah, Rajasthan, Odisha, Bihar, Jharkhand leh West Bengal aṭangin NCC cadet 329 an tel a ni.

Cultural Festival

Art & Culture department, Mizo Cultural Organisation leh Vanhne VC leh YMA-te chuan nimin khan Vanhne Middle School tualah Cultural Festival an buatsaih a, Lunglei Municipal Council chairman Lalzuithanga'n a hmanpui. Festival-ah hian MCO branch leh cultural troupe 12-te'n hnam làm an entir bakah, zaithiamte an zai a ni.

MGNREGA zirho

State Institute of Rural Development & Panchayati Raj (SIRDPR), Mizoram chuan nimin khan Mamit District Panchayat Resource Centre conference hall-ah MGNREGS buaipuitute tan training an buatsaih a, Mamit DRDO project director Lalchhuanawma Chawngthu-in a hawng. Training hi ni li awh tur a ni a, SIRDPR bakah, line department-a thawkte'n MGNREGA hnuaia hlâwk zawka hna thawh dan tur an zirtir dawn a ni.

Mei zu mi 8 man

Aizawl District Anti Tobacco Squad chuan nimin khan puipunna hmunah mei zù an awm leh awm loh endikin Chanmari leh MacDonald Hills vela sorkar pisate an en kual a; phal lohna hmuna mei zu mi pariat manin, pawisa an chawitir.

Chetsualnaah thi

January 16, 2024 zing dar 7 vela Tata Intra AS/11 E C - 5622 in Aizawl lam aṭanga Rangvamual thlen hma deuha scooty-a a hnawla chuang Lalhmachhuani (19) d/o Isak Lalthuthlungliana chu nimin zing dar 6 khan a hliam tuar loin a thi. Scooty-ah hian mi pahnih chuangin Lalhmachhuani hi a khalhtu lo zawk a ni.