Hlawhtlin tum loa ṭanpuina sum chauh duhte kan ngaithei lo ang - CM

Chief minister Lalduhoma chu nimin khan State Bank of India hotu, Border Security Force hotu leh All Mizoram Farmers Union hruaitute'n a pisaah an kâwm. CM chuan, hlawhtlin tum loa sorkar aṭanga ṭanpuina sum chauh duhte an ngaithei vak dawn lo tih a sawi.

AMFU hruaitute nen an inkawmnaah Lalduhoma chuan, kut hnathawktute an ngai pawimawh hle tih sawiin, "Chutih laiin, hlawhtlin tum loa ṭanpuina sum chauh duhte erawh chu kan ngaithei vak lo ang," a ti a; tunah chuan ZPM policy-te kalpui turin budget thar an la nei lo a, nghah a ṭul thu a sawi a ni.

AMFU hian Tree Borne Oil Scheme hnuaiah Agriculture department nen ṭang dunin tung chíngtu chhungkaw 524 an enkawl mek a, kuminah chhungkaw 700 vel tihbelh an tum. Tung rah chu kg. khat Rs 54-in hralhna a awm reng niin an sawi.

Chief Minister hi a pisaah SBI general manager Dhruba Charan Bal-a'n a kâwm a, Mizorama SBI hmalaknate a sawipui.

CM Lalduhoma chuan, Mizorama bank ṭhenkhatte credit deposit ratio a hniam hle thu sawiin, a ngaimawh thu a lo hrilh a; mipui tana bank-te'n hmasawnna hna an thawhna pawimawh an ngaihthah deuh nia a ngaih thu leh Mizoram sorkarin Hand Holding Policy a kalpui turah bank-te'n mawhphurhna pawimawh tak an neih dawn thu a sawi bawk.

Dhruba Charan Bal chuan, SBI-in Mizoramah market share tam zawk nei turin loan tam zawk an pek theih nan hma an lak mek thu leh Mizoramah nasa zawka loan pek an tum thu CM a hrilh.

Aizawla BSF deputy inspector general Kalyan Kanti Mazumdar pawhin nimin khan CM Lalduhoma a pisaah a kâwm a; BSF-in an hna an thawhnaa harsatna an neih, Mizoram sorkarin a tih theih nia langte a hrilh. Chief Minister chuan, Silsuri-ah border trade centre sorkarin kalpui a tum dan a lo hrilh bawk.