CM leh IFAD hotu an inkâwm

Chief minister Lalduhoma chu nimin khan a pisaah International Fund for Agriculture Development (IFAD) country director Ulac Demiraq leh a thawhpuite nen an inkâwm a, FOCUS kaltlanga hmalakna an sawi dun.

CM Lalduhoma chuan, IFAD kaltlanga hnathawhte a hmuh tawh thu sawiin, Covid hripui vanga an beisei anga hna an thawh theih loh dan te, inthlanpui vanga an sum leh pai che vel a muan thute a hriatpui thu a sawi a, hei vang hian IFAD hmalaknate chu a hun chhung pawhsei a ṭul thu IFAD hotu a hrilh.

FOCUS hmalaknain Mizorama district paruk chauh a huam avangin district zawng zawng huama hmalak ṭha a tih thu sawiin Lalduhoma chuan, "Loneitute hmasawn zelna kan ngai pawimawh a, thlai thar thlan bik leina tur pawh kan ruahman. Heng thlai bik tharte pawh kum khat hnuah chuan nasa taka a pun a rin a ni," a ti.

Ulac Demiraq chuan, IFAD-in FOCUS kaltlanga hma an lâk tawh dan te, an hlawhtlinna hmuh tawh te, hmabak an la neihte leh hna an kalpuinaa harsatna an tawhte Chief Minister a hrilh a; FOCUS 2.0 an duan mek chu sorkar policy nen a inmil thu sawiin, a hlawhtlin ngei theih nan ṭanpuina a dil a ni.