Aizawl dist-a kum 14-18 zingah smartphone nei mipa 42.5% leh hmeichhia 40.8% an awm

Annual Status of Education Report (ASER) chuan ASER 2023 ‘Beyond Basics’ an buatsaih chu nimin khan New Delhi-ah an tlangzarh. Aizawl district-ah tleirawl/ṭhalai kum 14-18 inkar zingah mahni puala smartphone nei mipa 42.5% leh hmeichhia 40.8% an awm tih tarlan a ni.

ASER 2023 Beyond Basics survey hi state 26-a district 28-ah neih a ni a, kum 14-18 inkar mi 34,745 zawhna zawh a ni. Mizoramah chuan Aizawl district-ah DIET, Aizawl leh Mizoram University-a zirlaite'n an buaipui a ni.

ASER 2023 zirchiannaa a lan danin, Aizawl district-ah zawhna chhangtu zinga 89% chuan an chhungkuaa tu emaw berin smartphone an nei a, 92%-in smartphone an hmang thei. Smartphone hmang thei mipa zinga 42.5% chuan anmahni pualin smartphone an nei a, hmeichhia zingah 40.8%-in smartphone an nei bawk.

Aizawlah kum 14-18 inkar zinga 81.6% chu zirna-inah mumal taka inziak lut an ni a, 50% chu sorkar zirna-ina inziak lut an ni. Chutih laiin, 18.4% chu zirna-inah an inziak lut lo.

Kum 17-18 inkar zingah zirna-in engah maha inziak lut lo mipa 21.4% leh hmeichhia 15.5% an awm a; 1.7% chu vocational training eng emaw berah an inziak lut. 22.2% chu survey neih hma thla khat chhungin ni 15 tal hna eng emaw (inchhung hna tih loh) an thawk a ni.