Kuhva tawlh rûk ip 100 man leh a ni

Saitual police-te leh North Lungpher VDP ṭangho chuan January 16, Thawhlehni zan dar 9:44 khan North Lungpher ram chhungah truck pakhat aṭangin Myanmar lam aṭanga dan loa lak luh kuhva ip 100 an man.

Thu dawn danin, kuhva neitu chu Mawii, Ṭhuampui, Aizawl nia inchhál a ni a; kuhva phurhna truck MZ-04 A-6621 neitu chu Lalrinawma, Champhai Electric Veng niin, a khalhtu chu Zosangliana (18) s/o Daniala, Champhai Venglai a ni. Handyman Laltlankima (18) s/o Laldinliana, Champhai Electric Veng a tel bawk.

Kuhva phurtu truck hi lirthei dang - Suzuki Super Carry MZ-04 A-7120-in a zui a, a neitu leh khalhtu chu Lalthlamuana (34) s/o C Zirthanga, Champhai Kanan Veng a ni.

Kuhva tawlh rûk chu Zokhawthar bul Ṭiau lui kam, Laipian kai, Myanmar ram aṭangin January 16, 2024-ah phurh chhuah a ni a, Champhai Khankawn police check gate hêlin, Zokhawthar - Rabung - Saichal - Lungpher - Buhbàn - Chalfilh Vanzau - Khanpui - Hmunnghak - Seling - Aizawl kawngah an kal kual a ni.

Dan loa kuhva tawlh rûk man leh chung­changah hian Home minister K Sapdanga chuan, "Danin a kawng a zawh zel theihna atana rim taka thawktu Mizoram Police leh Home Department te, sorkar thâ tichaktu khawtlang ṭangrual pawlte chungah thinlung leh tih tak zetin lawmthu ka sawi. Kan ramah danin awmzia a neih a, dan rorelnain a kawng a zawh zel theihna turin ṭtanrualpuiah Zoram mipui ka sáwm tak meuh a ni," a ti. Kuhva tawlh rûk phur lirthei chhuahtir a awm lo tih a tarlang bawk.