MZP-in NIT Convocation an dodal

National Institute of Technology (NIT), Mizoram-in nimina Berawtlanga convocation an neih tur chu NIT assistant registrar post-a hna lâk dan a dik loa an ngaih avangin MZP chuan dodalin, Berawtlangah an pungkhawm a, convocation-a tel turte an dang.

NIT Convocation hi tlai dar 5-ah ṭan tur a ni a, chhun dar 12 vel aṭangin MZP mi leh sate an pungkhawm a, police eng emaw zatin an vil. MZP hian convocation-a tel tur zirlai ṭhenkhat chu an dang a ni.

Chief minister Lalduh­oma chuan Zokhawsanga a kal pahin MZP pungkhawmte chu a tlawh a; MZP hruaitute an thil phûtte NIT Board of Governors sawipui turin an lo ngen.

Tlai dar 4:30-ah MZP hruaitute leh NIT BoG hotute chair­man Harshavardhan Neotia hoin Berawtlang Tourist Lodge-ah an inbia a, an inbiak zawhah MZP chuan NIT Convocation dodalna an lantir chu an titawp.

MZP chuan, Harshavardhan Neotia chuan hna lak dan chu chhui a tiam bakah, Ministry of Education-ah hmalakpui a tiam niin an tarlang a, a hmalakna an en zui zel dawn thu an sawi bawk.