Ui seh vanga natna ûm bo dan tur zirho

Health & Family Welfare department chuan nimin khan Royale Lalawi Hotel-ah ui seh vanga natna (rabies) ûm bona tura state sorkar leh district-a sorkar thuneitute ruahmanna (action plan) an siam zirhona an buatsaih a; AH&Vety minister C Lalsawivunga'n a hmanpui.

'Finalization of State Action Plan and Development of District Action Plan for Eliminating Dog Mediated Rabies by 2030 for the State of Mizoram' tih sawihona hi ni hnih awm tur a ni a, Vety department officer-te bakah, Integrated Disease Surveillance Programme (ISDP) leh ZMC-a thawkte leh Jhapiego aiawhte an tel. Vawiinah chhunzawma zawh a ni ang.

Vety Minister chuan, ran vulh zingah ui chu mihringin an chênpui nasat a nih avangin venhim ṭhat a, hri danna (vaccine) laktirah ṭan lâk a ṭul thu a sawi a; ran dangte pawh natna laka ven him nan hri danna pek zel a pawimawh thu sawiin, "Vety department chuan theihtawp chhuaha kan ran vulhte natna laka venhim hi kan priority (ngaih pawimawh hmasak) a ni tur a ni," a ti.

C Lalsawivunga chuan, ui seh vanga natna rabies thihpui an awm ṭhin chu pawi a tih thu sawiin, kum 2030 ral hma ngeiin rabies ûm bo a nih theih nan theihtawp chhuah turin kal khawmte a chah.

Khualzahawm Zarzokimi, UDPA joint secretary chuan, Aizawl Municipal Corporation leh Lunglei Municipal Council leh district office-te kaltlangin kum 2030 ral hmaa rabies ûm bo a nih ngei theih nan dan mumal tak siama hnathawh an tum thu a sawi.

Zirhonaah hian Mizorama ui seh vanga harsatna thlen dan dinhmun leh rabies ûm bo a nih theihna tura hmalak dan tur ruahmannate sawiho a ni.