Lungleiah Faina Hnatlang huaihawt

Lunglei DC Office leh UDPA department chuan nimin khan Lunglei Municipal Council (LMC) huam chhunga higher secondary school-a National Service Scheme (NSS) volunteer-te tan Faina Hnatlang an huaihawt a, Lunglei khawpuia hmun ṭhenkhat an thian fai.

Nimina Faina Hnatlangah hian HSS pathum - Lunglei HSS, Baptist HSS leh Leitlang HSS-a NSS volunteer mi 350 vel an thawk chhuak a, Ṭhuamluaia Muala hnawkte an thian fai a ni. Lunglei Venglaia Tennis Court hmun hluiah a hawnna inkhawm buatsaih niin, NSS volunteer-te chu faina thutiam sawi rualtir an ni a; khuallian bawrhsap Ramdinliani'n thu a sawi.

Ramdinliani chuan, Lunglei khawpuiin faina lamah hmabak a la ngah thu sawiin, "UDPA-in puipunna hmunah bawlhhlawh báwmte a húng a, a ṭhen chu plastic bottle chauh paihna turte a nih laiin, bawlhhlawh chi tin paih nan kan hmang leh mai ṭhin. Aizawlah bawlhhlawh ṭawih thei leh ṭawih thei lo an thliar hran theih tawh laiin Lunglei chuan kan la thei ve lo. Tun aṭanga ṭan kan lak nasat a ngai a, changkan kan duh chuan kan fai hmasak phawt a ngai," a ti.

Lunglei DC Office leh UDPA department hian Lungleia higher institution pali - Lunglei College, JB College, Mizoram Poly-technic leh HATIM-a NSS volunteer-te pualin January 25, 2024-ah faina hnatlang an huaihawt leh dawn a ni.