Kawlphetha hman man tisang

Joint Electricity Regulatory Commission (JERC) for Manipur and Mizoram ruahman angin, nimin April 1 aṭang khan Mizoramah kawlphetha hman man tihpun a ni a, a punna chu chawh rualin 4.02% a ni.

Power & Electricity department hotute sawi danin, kawlphetha hman man thar ang hian sorkar kum thar, April 1 aṭangin bill siam a ni dawn a, a man thar ang hian April thla hman man aṭangin pek tur a ni.

Kawlphetha hman man hi chenna in (domestic)-a hman man unit 50 chin hnuai lam unit khat zela Rs. 2.10 ni ṭhin chu Rs. 2.35 a ni tawh dawn a, unit 50 chin chung lam, Rs. 3 ni
ṭhin chu Rs. 3.25 a ni tawh ang.

Unit 100-200 hman man unit khat Rs. 3.90 ni ṭhin chu Rs. 4.20 a ni tawh dawn a, unit 200 chin chung lam hman man Rs. 4.60 ni ṭhin chu Rs. 4.80 a ni tawh ang.

Kawlphetha hmang tlem ho, mirethei zawk (Kirty Joyti) tana fixed charge, connection pakhata thla tin Rs. 10 chawi ngai ṭhin chu Rs. 12-ah tihpun a ni. Unit 15 chin hnuai lam hman man unit khat Rs. 1.20 ni ṭhin chu Rs. 1.40 a ni tawh ang a, unit 15-30 inkara hman man Rs. 1.80 ni ṭhin pawh Rs. 2.05 a ni dawn a, unit 30 chung lam tana hman man Rs. 2.10 ni ṭhin chu Rs. 2.35 a ni tawh dawn.

Sumdawnna (commercial) thila kawlphetha (low tension) hmang man pawh tihdanglam niin, a hmaa unit 100 hnuai lam hmangtute'n unit khata Rs. 3.35 an chawi ṭhin chu Rs. 3.60-ah tihpun a ni.

Unit 100-200 inkar hmangte tana unit khat man Rs. 4.35 ni ṭhin chu Rs 4.60 a ni tawh ang a; unit 200 chin chung lam hmangte tan unit khat man Rs. 5.30 ni
ṭhin chu Rs. 5.50 a ni tawh ang.

Kawlphetha hman man tihpunna tur hian P&E department chuan November 2015 khan JERC-ah rawtna thlenin, 8.2%-a tihpun a rawt a; JERC-in mipui ngaihdan a lak hnu leh a zir chian hnuah 4.02%-in a tipung ta a ni.

Kawlphetha hman man tihpun turah hian February 2016 khan Mizoram sorkarin gazette a chhuah.