BADP atan nuai 3862 hmuh a ni

State Level Screening Committee on Border Area Development Programme (BADP) chu, nimin khan Secretariat conference hall-ah additional chief secretary Arvind Ray hoin an ṭhukhawm. BADP hnuaiah hian kum 2015-16 chhungin sorkar laipui aṭangin cheng nuai 3,862 hmuh a nih thu tarlan a ni.

Meeting-ah hian Rural Development secretary Lalhmingthanga chuan BADP hnuaia hnathawhte sawifiahin, RD Block hrang hranga mawhphurhna latu officer-te'n kum 2015-16 chhunga an hnathawh tlangpuite a sawi a; kum 2016-17 chhunga hmalakna tura ruahmanna an siamte an tarlang.

BADP hnuaia hmasawnna hna thawhna turin Ministry of Home Affairs chuan Mizoram sorkar hnenah kum liam ta 2015-16 atan cheng nuai 3,862 a pe a, nuai 3,812 hman ni tawh. Cheng nuai 50 chu BADP hnuaia hnathawhte enzui tura Monitoring Cell hna thawh nan hman tur a ni.

BADP hi ramri depa cheng mipuite tihhmasawnna tura sorkar laipui programme a ni a, hna thawhna tur sumte chu sorkar laipuiin a tum vek a ni.