Zoram ruai fatu-ah MNF buatsaih: Zorama

MNF president Zoramthanga chuan, Mizoram hmun hrang hrangah mipuiin MNF an zawm thar an zel nia sawiin, "Pathianin Zoram tana ruaipui a buatsaih tur fatu atan MNF a buatsaih mek a, Congress sorkar an hnâwl mek a ni," a ti.

Nimina Mizo Hnam Rûna inkhawmah Zoramthanga chuan, Congress sorkar chu sum leh pái enkawl kawngah an hlawhchham nia sawiin, "Sorkar leibat pangngai cheng vbc. 7,000 vel a awm a, K-Deposit-ah ringawt pawh vbc. 1,600 chuang min hnutchhiah mek bawk," a ti a; sorkar chu sorkar hnathawk leh an chhungte’n an ning tawh hle niin a sawi.

Congress kaihhruai sorkar kohran pawi sawiin zu an zuar lui nia sawiin, Zoramhanga chuan, "Pathian pawi nasa tak an sawi avangin inthlan lehah mipuiin MNF tihtlin an tum vek tawh. Pathian leh mipui zarah MNF kan sorkar leh ngei ang a, NLUP ang leka a thlawna sum sem ni lo, SEDP changtlung zawk nen hma thar kan la dawn a ni," a ti.

MNF President chuan, an party chu Mizo hnam thinlung pû leh nunpuitu an nia sawiin, "Hnam dang culture leh nunphung hrim hrim zawm hi Pathian duh dan a ni lo a, Mizo culture leh Mizo zia chawimawia nunpui hi Pathianin Mizote min duh dan a ni," a ti a; hnam dang party, a tira inthlahrung taka Mizorama lutte'n tunah chuan inthlahrunna nei loin Mizote an rûn tawh niin a sawi bawk.

MNF thuchhuah tarlan danin, nimina Mizo Hnam Runa inkhawmah hian MNF-ah Mizoram Police Service officer pension tawh mi pali an lawm lut niin a tarlang.