Buhfai hralh chhuahna tur kháwl sem

Food, Civil Supplies & Consumer Affairs (FCSCA) department chuan nimin khan Dawrpui Multipurpose Hall-ah Food Security Act, 2013-in a ken tel retailer dàwr tina buhfai leh thil dang hralh chhuahna tur kháwl - electronic point of sale device semna hun leh khawl hman dan retailer-te zirtirna hun an buatsaih a, deputy chief minister Tawnluia'n a hmanpui.

Inkhawm hi FCSCA secretary HL Ro­chung­nunga'n a kaihruai a; Tawnluia chuan, thil thar Mizorama hman ṭan a ni tur chu hmasawnna a nih thu sawiin, "A loa kan awm theih loh, kan chawpui ber lâk khawm hi sorkar chuan Supply department kutah dahin, a sem chhuah hna chu retailer-te'n an thawk a. He hna hi dàwrkai dangte nen a inang lo a, mahni mimal hlâwkna chauh atana thawk kan ni lo tih hriaa rawngbawlnaa ngaia retailer-te'n an thawh a ngai a ni," a ti.

Fair price shop automation tana khawl hman ṭhin hi electronic point of sale khawl a ni a, bûkna kháwl (electronic weighing machine) a keng tel. Khawl hian finger print scanner, touch screen, QWERTY keypad, thermal printer, SIM card slot pahnih leh wifi adapter-te a nei a; mit notê (iris) scanner pawh vuah belh theih a ni.

Ration la tur chuan an chhungkaw ration card number emaw, Aa­dhaar number emaw POS machine-ah chhu lûtin, finger print scanner-ah a kut zungṭang a nem tur a ni. Aadhaar number leh a finger print a inmil chuan an chhungkaw ration lak theih zat quota a lang ang a, POS khawl nena inzawm electronic weighing device-ah a ration lak tur zat bûk a ni ang.