Governor leh AR hotu an inkâwm

December 12, Inrinni khan Assam Rifles inspec­tor general (East) Maj.Gen. Ranjit Singh chuan Governor PS Sreedharan Pillai chu Raj Bhavan-ah a kâwm a, ram venhimna leh thil pawimawh dangte an sawi dun.

Governor chuan, Mizoram mipui, a bikin thingtlang lamah khawtual mite hmasawnna atan Assam Rifles-in hna ṭha tak an thawk tih a hriat thu a sawi a; AR-te chu 'Tlang mite ṭhian' an nih anga hna ṭha thawk chhunzawm zel turin Major General a sâwm.

Maj.Gen. Ranjit Singh chuan, Assam Rifles-ten an awmna hmun hrang hrangah a theih anga khawtual mite tan theihtawp an chhuah thu a sawi a, "Ram venhim hna pawh ṭha takin kan thawk. Kawng ṭha zawk leh inbiakpawhna ṭha zawkte Mizoram hmun kilkhâwr zawkah siam a ngai niin ka hria," a ti.