Dan loa rawn lut Rohingya hmeichhe 8-te Vairengte police-in thla 20 an kawl tawh

April 19, 2019-a dan loa Mizorama luh tum Rohingya hmeichhe pariat, Mizoram police-in Vairengtea an mante chu Vairengte police-in he thu ziah lai thleng hian an la kawl a, thla 20 an kawl tawh.

Rohingya hmeichhiate'n an sawi dan chuan, Bangladesh rama Sabulara hmuna Kutupalong refugee camp-a awm an ni a, April 19, 2019 khan an bazar tur chu mi tu tih hriat lohte'n motor-ah hlángin an phur bo a ni. Silchar aṭangin Aizawla kalpui turin maxicab-ah phurh an ni a, Vairengteah police-in an lo man a ni. Anmahni phurtu maxicab khalhtu chuan, Zemabawk petrol pump-ah Burmese Rohingya hmeichhiate chu lo lam tura hrilh a nih thu a sawi. Man an nih hnuah Fast Tract Court, Kolasib-ah hruai an ni a, Rs. 50 ṭheuh chawitir an ni.

He thubuai hi mihringa sumdawnna (human trafficking) nia hriat ni mah se, police-te'n an chhui zui hnuah pawh a mawhphurtu tak hriat a ni lo a, a kaihhnawihah mi man an la nei lo.

Rohingya hmeichhiate hi observation home emaw, detention centre emaw dah loin Vairengte police station-a temporary detention-ah dah an ni a; a tìr lamah Lailapur aṭangin Muslim pawl ṭhenkhatin an ei tur leh chawhmehte an pe ṭhin a, tunah chuan an pe tawh lo. Anmahni enkawlna senso atan cheng eng emaw zat hman a ni tawh.

An awmna chu temporary detention centre a nih avangin jail táng anga khung beh a rem lo a, duh leh mamawh an neih reng avangin bazar-a an kal turte pawh police-in an vèn a ngai. Hei vang hian police-te an indaih loh phah a, an hnathawh kawngah a tiṭhuanawp nia thu dawn a ni.

Rohingya hmeichhiate chungchangah hian sorkar laipui chuan Myanmar sorkar hotute a dàwr reng a, Myanmar sorkar pawhin tun hnai khan an zinga pakhat chu an ram mi a nih thu pawmin, an rama kîr turin phalna a pe tawh. Mahse, mi dang pasarih chungchangah inbiakna neih zel a ni a, file pawh Home Ministry lamah a thang mek niin police hotute chuan an sawi.