Zoram Medical College enkawl nan special package pek a ni dawn - Union Health Minister

Union Health & Family Welfare minister Mansukh Mandavya chuan, Mizoram sorkarin ṭha taka Zoram Medical College a enkawla a kalpui theih nan a bik taka puihna, special package pek a nih tur thu a sawi.

Union Health Minister hi January 17, Nilaini khan Mizoram Health minister Lalrinpuii'n a kâwm a, ZMC chungchang bakah, thil pawimawh dangte a sawipui. National Health Mission mission director Dr Eric Zomawia leh HFW official dangte'n an ṭawiawm a ni.

Sorkar thuchhuah tarlan danin, Lalrinpuii chuan, ZMC hmasawn zel dan tur Union Minister hnenah thlenin, theihtawp chhuahpui turin a ngen a; Mizoram sorkar tan ṭha taka enkawl a hautak lutuk dawn chuan sorkar laipui kuta hlan mai ṭhaa an hriat thu a hrilh.

Mansukh Mandavya chuan, Mizoram sorkar chu ṭha taka thawhpui a, theihtawpa ṭanpui a inhuam thu sawiin, Mizoram sorkarin ZMC a enkawl chhunzawm theih nan a bik taka puihna, special package pek an nih tur thu Lalrinpuii a lo hrilh a ni.

HFW minister Lalrinpuii hian chief minister Lalduhoma a ráwn nghal a, special package chu project siam a, CM hoa bawhzui nghal tum a nih thu sorkar thuchhuahin a tarlang.

ZPM kaihhruai sorkar a pian hnu lawk, December 13, 2023-a Council of Minister ṭhukhawm chuan, ZMC chu sorkar laipui kuta hlan turin hmalak an lo remti tawh a ni.

Minister Lalrinpuii hian NITI Aayog member Dr Vinod K Paul pawh a kawm a, health sector leh tourism lama kawng hrang hranga hmasawnna neih theih dan tur a sawipui a; hemi chungchangah hian Mizoram sorkar hotute leh NITI Aayog member-te a bik taka ṭhutkhawma sawiho thuai turin an inthlah a ni.