Retailer-te'n sorkar thupek zâwm an tum lo?

Mizoram sorkar chuan Mizoram khua leh veng hrang hranga fair price shop neitu retailer-te chu mipui hnena buhfai hralh turin thla pum inhawng turin a lo hriattir tawh a, mahse, retailer eng emaw zat chuan sorkar thupek hi tun thlengin an la zâwm lo nia thu dawn a ni.

Food, Civil Supplies and Consumer Affairs (FCSCA) chuan tun hnai khan thupek chhuahin, an hnuaia retailer-te chu mipuite'n an hman huna an dawr theih turin chawlhkar tluan leh thla tluana inhawng ngei turin a hriattir a; Pathianni tel loin ni tin zing dar 06:30-08:30 inkar leh tlai dar 3:30-05:30 inkarah fair price shop hawng ngei turin a hriattir a ni.

FCSCA department chuan, DCSO-te chu an huam chhunga retailer-te'n sorkar thupek an zawm leh zawm loh vil a, thupek zâwm lote chu show cause notice pe tur leh a ṭul anga hmala zui zel turin a hriattir bawk.

Hetih lai hian, Aizawl district-ah chuan khua leh veng hrang hrangah tunlai hian retailer-te'n buhfai an sem mek a; veng ṭhenkhatah chuan buhfai lâk theih thu mipui an hriattirnaah, fair price shop chu chawlhkar tluan leh thla tluana hawng lo a, hawn hun chhung tur bitliah tarlan tel a ni.

FCSCA minister B Lalchhanzova chuan, buhfai sem chungchanga FCSCA department thupek bawhchhia an awm chuan thuneitute hnenah thlen mai tur a nih thu a sawi.

Chawlhkar tluan leh thla tluana fair price shop-te hawng tura hriattir hi mipuiin sum leh paia harsatna an neih pawha thla khat chhunga an chanpual (quota) an lâk theihna tura ruahman a ni.