Mizoram House leitua puh a nih avangin CM hlui fapa district court-ah a zualko

Chief minister hlui Zoramthanga fapa Ramthansiama chuan Ballygunge, Kolkata-a Mizoram House leinaah inhnamhnawiha puh a nih chungchangah nimin khan Aizawl District Court-ah criminal complaint a thehlut.

Vanglaini thu dawn danin, Ramthansiama hian puh a nihna chungchangah hian January 16, 2024 khan Cyber Crime Police Station-ah FIR thehluh a tum a, police-te'n court-a kal phawt tura an tih angin nimin khan court-ah criminal complaint a thehlut a ni.

Complaint a theh­luhnaah hian Ramthansiama chuan, dâwta puh a nih thu leh a pa CM hlui Zoramthanga pawh nasa taka tih­hmingchhiat a nih thu a tarlang a, "A nghawng tur hre sain, keimah leh ka pa tihhmingchhiat vek leh mipui náwlpui rilrua kan dinhmun hnuh hniamsak leh kan zahawmna tih­chhiatsak vek an tum tih a chiang a ni," a ti.

Ramthansiama chuan, dâwta amah puhtute'n IPC Section 499 an bawhchhia tih tarlangin, dan anga an chunga hremna lek a nih theih nana hma la turin court a ngen.

Ballygunge, Kolkata-a Mizoram House hmun Mizoram sorkarin a hralh chungchangah social media lamah a leitu zingah Ramthansiama a tel nia tarlan a awm a ni.