Mizoram sawhthing, hmarcha leh aieng ram chhung leh páwna hralhpui inhuam

New Delhi-a chám mek minister F Rodingliana chuan sorkar laipui hotute leh páwl hrang hranga thuneitu a kâwm a, Mizoram mamawhte a thlen. NECTAR hotute'n Mizorama thar sawhthing, hmarcha leh aiengte India ram chhung leh páwna hralhpui an inhuam thu an lo hrilh.

Commerce & Industries minister F Rodingliana hian North East Centre for Technology Application & Reach (NECTAR) director general Dr Arun Kumar Sarma kâwmin, Mizoram thlai tharte lei leh hralh dan tur a sawipui. Dr Arun Kumar Sarma chuan, Mizorama thar sawhthing, hmarcha leh aiengte chu India ram chhung leh páwna hralhpui a inhuam thu leh a tam lamah harsatna a awm a rin loh thu a lo hrilh a ni.

Rodingliana hian sorkar laipuia Commerce & Industries additional secretary pahnih Rajesh Agrawal leh Amardeep Singh Bhatia te pawh a kâwm a, India leh Bangladesh ramria insumdawn tawnna chungchanga Mizoram sorkar policy a sawipui.

Rural Electrification Corporation (REC) Limited chairman Vivek Kumar Dewangan nen an inkawmnaah Power & Electricity minister Rodingliana chuan, Mizoram chu state dang nen inanga khai rual theih a nih loh thu a hrilh a, "Zalenna sual vangin kum 20 zet rambuai a ni a, hmasawnna kal mumal thei loin a ṭhuanawp a, tunah state ralmuang ber zinga mi kan ni leh tawh. Chuti chung chuan sum leh paiah kan la harsa em em a, sorkar hnathawkte hlawh pawh kan pe thei ṭâwk ṭawk a ni," a ti.

REC Chairman chuan, state sorkarin hna a thawh tawhah utilization certificate 10% chauh pawh department-in sorkar laipuiah thehlut se, Revamped Distribution Sector Scheme bikah chuan second instalment a lo pek tur thu Rodingliana a hrilh.

PE Minister hian power lam tihhmasawn, smart meter hman leh kawlphetha hloh tihtlemna tura PE department-in DPR cheng vbc. 806 hû an thehluh chu a taka tihlawhtlin a ṭul thu te, Mizoramin power 33% chuang transmission loss a neih thute a sawi a, transfomer tam zawk (72%) chu kum 20 chuanga upa an nih tawh avangin tihchangtlunna tur DPR an thehluh chu pawmsak turin a ngen.

Vivek Kumar Dewangan chuan Mizorama kawlphetha la luh lohna khuaa kawlphetha lak luhna tur DPR cheng vbc. 144 hû thehluh tawh chu pek ngei a tum thu a sawi.

F Rodingliana hian Govern­ment e Marketplace chief executive officer PK Singh kâwmin, Mizorama sumdawnna leh kutkawih eizawnna chawikân dan tur a sawipui a; PK Singh chuan, Mizorama thil siam chhuahte khawvel hmun dang thleng pha turin zau zawka hralhpui a tum thu a lo hrilh.

Minister hian Small Industries Development Bank of India chief general manager Sunbransu Acharya pawh a kâwm a; Mizoram Finance department-in a remtih phawt chuan Hand Holding Policy atan a pung tlema cheng vbc. 200 pûktir dan tur ngaihtuah an tum thu a lo hrilh a ni.